काभ्रेका जनप्रतिनिधिमाथि सहकारीको रकम झ्वाम पारेको आरोप
काभ्रेपलाञ्चोक जिल्लाको भुम्लु गाउँपालिकाका एक जनप्रतिनिधिमाथि सहकारी संस्थाको रकम तलमाथि गरेको आरोप लागेको छ । वडा नम्बर १ सापिङका वडा सदस्य दानकुमारी महत खत्रीले राजनीतिक पहुँचका आधारमा सर्वसाधारणको बचत रकम हिनामिना गरेको स्थानीयले आरोप लगाएका हुन् ।
उर्लेनिस्थित श्री भीमेश्वर महिला कृषक समूह (सहकारी) को अध्यक्षसमेत रहेकी दानकुमारी वडा सदस्यमा निर्वाचित भएपछि पनि यस्तै विभिन्न समूहमा बसेर रकम हात पार्ने गरेको स्थानीयको भनाइ छ । २०७२ सालमा स्थापित उक्त सहकारीको स्थापनाकालदेखि नै अध्यक्ष बनेर उनले बचतकर्तालाई समेत दुर्व्यवहार गर्ने गरेको एक स्थानीयले आरोप लगाए । प्रारम्भमा झण्डै ४५ जना बचतकर्ताबाट थालिएको सहकारी राम्रो हुँदै गएपछि अन्य सदस्यले हरहिसाब देखाउन आग्रह गर्दा सचिवलाई नै विभिन्न आरोप लगाएर दानकुमारीले संस्थाबाट निकालेकोमा उनले गुनासो गरेका छन् ।
सहकारी भवन निर्माणका लागि गाउँपालिकाले ९ लाख रुपैयाँ बजेट छुट्याएपछि कामको जिम्मा दानकुमारी आफैँले लिएकी थिइन् । तर, जब सदस्यहरुले खर्चको हिसाब माग्न थाले त्यसपछि लफडा शुरु भयो, र अहिले एक अर्काबीच आरोप–प्रत्यारोप चलेको छ । भवन निर्माणका लागि आएको बजेटको पारदर्शिताबारे प्रश्न गर्दा अध्यक्ष दानकुमारी चरम असहिष्णु बनेको सहकारीका सचिव यशोधा खत्रीको गुनासो छ । भवन निर्माणको पहिलो किस्ताको रकम निकासा भएपछि त्यसको हिसाब माग्दा उल्टै आफूलाई सचिवबाट हटाएर आफू निकटको मान्छे राखेको उनको भनाइ छ ।
यस्तो किचलोबीच थप १ लाख ५० हजार बजेट विनियोजित भएपछि स्थानीय थप आक्रोशित बनेका छन् । लफडा झन् चर्किने भएपछि दानकुमारीले एक्लौटी निर्णय गरेर पुनः सचिव फेरेकी हुन् । यसअघि यशोधाको ठाउँमा नियुक्त सरस्वती महतलाई निकालेर बिन्दा बानियाँलाई सचिव बनाइएको स्थानीय बताउँछन् ।
‘मन परेको मान्छेलाई ऋण दिने, बचतको रकम आफ्ना आफ्न्तलाई दिने गर्छिन् । किन एकलौटी यस्तो गरेको भन्दा यशोधा र मैयाँलाई सहकारीबाटै निकालियो’, स्थानीय एक पीडितले दुःख पोख्दै भने, ‘उल्टै न्यायपालिकामा हामीविरुद्ध नै उजुरी हालियो । लेखपढ नगरेकालाई सचिव बनाउने, हिसाब अन्तै गराउने अनि हिसाब खोज्यो भने निकालेर आफ्नो मान्छे राख्नुको नियत सहजै अनुमान गर्न सकिँदैन र ! ’
यता, करिब ९ लाखमा बनेको १ कोठे भवन अहिलेसम्म सहकारीको नाममा दर्ता भएको छैन । सहकारीका अध्यक्ष तथा वडा सदस्य दानकुमारी महतले भने आफूले कुनै गल्ती नगरेको दाबी गरेकी छन् । उनले गाउँपालिकाका पूर्वअध्यक्षको सल्लाहमा सचिव फेरेको बताइन् ।
जनप्रतिनिधिको जिम्मेवारीमा रहेको अवस्थामा किन सबैतिर आफैँ अगाडि सर्नुभयो ? भन्ने जिज्ञासामा उनले भनिन्, ‘सबैले जिम्मेवारी लिन बाध्य पारेपछि बसेको हुँ । कुनै बदमासी गरेको छैन । मलाई ठूला हिसाब गर्न आउँदैन, स्कुलका सरहरुले भवन निर्माणको हिसाब गर्नुभएको छ । आवश्यक परे कुनै दिन हिसाब देखाउँला’, उनले भनिन् ।
हिसाब देखाउन आनकानी गरेकाले अध्यक्षविरुद्ध १५ जना सदस्यले हस्ताक्षरसहित पालिकाको न्यायिक समितिमा उजुरी पनि हालिएको बताएका छन् । तर, अहिलेसम्म त्यसउपर कुनै कारवाही नभएको सरोकारवालाहरु बताउँछन् ।
टिप्पणीहरू