अशोक सिग्देललाई मान्छे छान्ने अख्तियारी

डेढ महिनापछि नेपाली सेनाको सर्वोच्च कमाण्डरका रूपमा पदासीन हुनसक्ने अशोक सिग्देलले प्रधानसेनापतिमातहत रहने सैनिक सचिवालयको जिम्मेवारीमा एकतारे जर्नेल पूर्ण खत्रीलाई ल्याउन सफल भएका छन् ।

खत्री सिरहा मिर्चैयास्थित २८ नम्बर बाहिनीको प्रमुखबाट सरुवा भई सचिवालयको नेतृत्व गर्न आइपुगेका छन् । सचिवालयको नेतृत्व सम्हाल्नेले सेनापतिमा बढुवाको बेला गरिने सम्बोधन भाषणको मस्यौदा तयार गर्नुपर्ने हुन्छ । भूतपूर्व सैनिक र विभिन्न सैन्य युनिटको अवस्था, प्राथमिकता क्षेत्र निर्धारणजस्तै अस्पताल, एयरपोर्टजस्ता विषय, अहिलेका प्रधानसेनापतिले चालु गरेका तर अधुरा नीति तथा योजना कार्यान्वयन गर्ने भावको लेखाइ पनि त्यसैमा समावेश गरिन्छ । 

सेनापतिले रिटायर्ड हुनु एक डेढ महिनाअघि नैं विभिन्न युनिटको बिदाइ निरीक्षण भ्रमण गर्ने चलन हो । तर प्रभुराम शर्माले अहिलेसम्म त्यस्तो कार्यक्रम बनाएका छैनन् । बिदाइ निरीक्षणका क्रममा मेरो कार्यक्रममा पल्टनले राम्रो काम ग–यो, सबैले साथ सहयोग दिनु भयो त्यसका लागि धन्यवाद भन्ने चलन थियो ।

यसपल्ट भने पृतना र बाहिनीअड्डासम्म मात्रै यस्तो बिदाइ कार्यक्रम हुने सम्भावना छ । अर्कोतर्फ उपरथी योगराज शर्मा गएको बिहीबारदेखि विदा बसेका छन् भने सिरियाको गोलान हाइटमा शान्ति सेनाको नेतृत्व गरिरहेका निर्मल थापा असोजमा फर्केर आउने छन् । उनको स्थानमा उपत्यका पृतनापति सागर थापा जाने तयारी भइरहेको छ । 

(साभार:जनआस्था साप्ताहिकबाट)