आज बयान सकेर रविलाई कास्की फर्काउने तयारी

सुप्रिम सहकारी ठगीका आरोपित राष्ट्रिय स्वतन्त्र पार्टी (रास्वपा)का सभापति तथा पूर्वगृहमन्त्री रवि लामिछानेसँग आज तेस्रो दिन बयान शुरु भएको छ । 

जिल्ला सरकारी वकिलको कार्यालय रुपन्देहीमा बिहान १० बजेदेखि बयान शुरु भएको हो । सूर्यदर्शन सहकारी ठगी प्रकरणमा अनुसन्धानका लागि जिल्ला प्रहरी कार्यालय कास्कीको हिरासतमा राखिएका लामिछानेलाई मङ्गलवार दिउँसो रुपन्देही ल्याइएको थियो ।

मंगलबार पहिलो दिन मौखिक सोधपुछ र हिजो ९ घण्टा लामो लिखित बयान लिइएको थियो । जिल्ला न्यायाधिवक्ता प्रेमराज पौडेल, इलाका प्रहरी कार्यालय बुटवलका डिएसपी विजयराज पण्डित, जिल्ला प्रहरी कार्यालयका अनुसन्धान अधिकारीहरूको उपस्थितिमा भएको ९ घण्टा लामो बयानमा ५० प्रश्न सोधिएको थियो । हिजो अधुरो रहेका विषयहरूमा आज पनि लिखित बयान हुने बताइएको छ । 

सम्भवत: आज बयान सकिने र लामिछानेलाई कास्की फर्काइने रूपन्देही प्रहरी प्रमुख एसपी रञ्जितसिंह राठौरले जानकारी दिएका छन् । 

लामिछानेलाई बयानमा झिकाइएसँगै रास्वपाका कार्यकर्ताले भैरहवामा प्रदर्शन गर्दै आएका छन् । त्यस्तै, सहकारी पीडितले पनि आन्दोलन गरिरहेका छन् । सम्भावित सुरक्षा खतरालाई मध्यनजर गर्दै स्थानीय प्रशासनले जिल्ला सरकारी वकिल कार्यालयको सय मीटर आसपास निषेधित क्षेत्र घोषणा गरेको छ । 

बुटवलस्थित सुप्रिम सहकारी संस्थाको १४ करोड २९ लाख रुपैयाँ जिबी राइको समूहसँग मिलेर गोरखा मिडिया नेटवर्क प्रालिका प्रवन्ध निर्देशक रहँदाका बखत अपचलन गरेको लामिछानेमाथि आरोप छ । रविको नाममा १ करोड ९६ लाख ऋण प्रवाह भएको संसदीय विशेष छानविन समितिले निष्कर्ष दिएको छ । त्यसैका आधारमा जिल्ला अदालत रुपन्देहीले लामिछाने र उनका साझेदार पूर्वडीआईजी छविलाल जोशीसहित १२ जनाविरुद्ध पक्राउ पूर्जी जारी गरेको थियो ।