केपी ओलीसहित पाँच जनाकाे राहदानी राेक्का, उपत्यका छोड्न अनुमति अनिवार्य

पूर्व प्रधानमन्त्री केपी शर्मा ओलीसहित पाँच जनाको राहदानी रोक्का गर्न सिफारिस गरिएको छ । 

जेन-जी प्रदर्शनमा भएको दमनबारे छानविन तथा अनुसन्धान गर्न गठित उच्चस्तरीय जाँचबुझ आयोगले तत्कालीन प्रधानमन्त्री ओली र गृहमन्त्री रमेश लेखकसहित पाँच जनालाई विदेश जान रोक लगाउन सरकारलाई सिफारिस गरेको हो । पासपोर्ट रोकिनेमा पूर्व गृहसचिव गोकर्णमणि दुवाडी, राष्ट्रिय अनुसन्धान विभागका पूर्व प्रमुख हुतराज थापा र पूर्व प्रमुख जिल्ला अधिकारी छविलाल रिजाल पनि छन् । 

घटनाको अनुसन्धानका क्रममा उनीहरू जुन कुनै बेला पनि आयोगको कार्यालयमा उपस्थित हुनुपर्ने भएकाले उपत्यकाबाहिरको यात्रामा समेत प्रतिबन्ध लगाउन भनिएको छ । 

सरकारले जेन-जी प्रदर्शनको क्रममा भएको घटनामाथि छानविन र अनुसन्धान गरी कारवाहीको सिफारिस गर्ने कार्यादेशसहित पूर्व न्यायाधीश गौरीबहादुर कार्कीको अध्यक्षतामा तीन सदस्यीय जाँचबुझ आयोग गठन गरेको थियो । आयोगका सदस्य विज्ञानराज शर्माले आज एक पत्र लेख्दै घटनाका सम्भावित दोषीमाथि निगरानी राख्न माताहतका निकायलाई खबर गरेका हुन् । 

आयोगले उपत्यका छाड्न नपाउनेगरी निगरानी गर्न भने पनि पूर्व गुप्तचर प्रमुख थापा केही दिनअघि नै गृहजिल्ला रोल्पा पुगिसकेका छन् । तत्कालीन प्रजिअ रिजाल पनि उपत्यकाबाहिर नै रहेको बुझिएको छ ।

त्यस्तै, तत्कालीन गृहमन्त्री लेखक मातृ शोकमा छन् ।