उपचार रकमको नाममा बिरामी डेढ महिनादेखि राजधानीमै बन्धक

उपचार खर्च तिर्न नसक्दा पाँचथरको फालेलुङ गाउँपालिका ५, प्राङबुङका ३४ वर्षीय शुक्रबहादुर मगरलाई डेढ महिनादेखि अस्पतालमा बन्धक बनाइएको छ । उपचार खर्च तिर्न नसक्दा उनी काठमाडौंको दीर्घायु अस्पताल,चाबहिलमा फागुन १ गतेदेखि बन्धक बनेका हुन् ।

उपचार खर्च तिर्न नसक्दा दाजुलाई अस्पतालले बन्धक बनाएको उनकी बहिनी निर्मला मगरले बताइन् । अस्पतालको ‘२१४ नम्बरको बेडमा दाजु बन्धक हुनुहुन्छ,’ निर्मलाले भनिन् ‘उहाँलाई डिस्चार्ज गर्न नसक्दा हरेक दिन अस्पतालले बिल बढाइरहेको छ ।’

उपचार खर्चमध्ये ४० प्रतिशत रकम भुक्तानी गरिएको निर्मलाको भनाइ छ । ‘अब सात लाख ३५ हजारभन्दा बढी रकम तिर्न बाँकी छ,’ उनले भनिन् ‘अहिलेसम्म रकम जुटाउन सकिएन ।’ अप्रेशन, बेड, औषधि र अस्पताल भर्ना शुल्कको रकम तिर्न बाँकी रहेको बताइएको छ ।

बैदेशिक रोजगारीका लागि आवेदन गर्न काठमाडौं आएका शुक्रबहादुर उच्च रक्तचापका कारण अचानक बिरामी परेका थिए । उपचारका लागि अस्पताल भर्ना भएका शुक्रबहादुरकोे टाउकोको अप्रेशन गरिएको छ । उक्त अस्पतालका चिकित्सक गोपालरमण शर्माको टीमले अप्रेशन गरेको हो ।

‘अझै पनि दाजुको एकातर्फको हातखुट्टा चलेको छैन,’ बहिनी भन्छिन् ‘थेरापी गर्दा ठीक हुन्छ भनेर चिकित्सकहरुले सल्लाह दिनुभएको छ । अस्पतालमै बन्धक बनेपछि थप उपचार गराउन पाइएको छैन ।’

शुक्रबहादुरलाई अस्पतालबाट डिस्चार्ज गर्न उनको परिवारले आर्थिक सहयोगको अपिल गरेको छ । चाबहिलस्थित ग्लोबल आइएमई बैंकमा ढकराज मगरको नाममा ३७०७०१०१६३७७४ नम्बरको खाता खोलेर आर्थिक सहयोगको याचना गरिएको छ ।