सानो जिल्लामा पनि पुरुषभन्दा महिला मतदाता बढी

आगामी वैशाख ३० गते हुने स्थानीय तहको चुनावमा भक्तपुरका चारवटा नगरपालिकाबाट एक लाख ८९ हजार पाँचसय ८४ जना मतदाता सहभागी हुँदै छन् । मुलुककै सबैभन्दा सानो जिल्लामा पुरुषभन्दा महिला मतदाता बढी पाइएको छ ।

यस पटकको स्थानीय चुनावमा ९७ हजार तीनसय १४ महिला मतदाताले आफ्नो मताधिकार प्रयोग गर्नेछन् । त्यसैगरी, ९२ हजार दुईसय ६५ पुरुष र पाँच जना तेस्रो लिङ्गी रहेको जिल्ला निर्वाचन कार्यालयले जनाएको छ ।

कार्यालयका सूचना अधिकारी भीमबहादुर बिसीका अनुसार भक्तपुर नगरपालिकामा २९ हजार ६ सय १४ महिला र २७ हजार ६ सय ५६ पुरुष गरेर ५७ हजार दुई सय ७० मतदाता छन् ।

२२ हजार सात महिला र २१ हजार ९८ पुरुषसहित चाँगुनारायण नगरपालिकामा ४३ हजार एक सय पाँच मतदाता छन् । त्यसैगरी, सूर्यविनायक नगरपालिकामा २४ हजार तीन सय ८५ महिला छन् भने २२ हजार नौसय ८० पुरुष र दुई जना तेस्रो लिङ्गी गरेर ४७ हजार तीनसय ६७ मतदाताले आगामी निर्वाचनमा आफ्नो मताधिकार प्रयोग गर्दैछन् ।

यता, मध्यपुरथिमी नगरपालिकामा ४१ हजार आठ सय ४२ मतदाता छन् । २१ हजार तीन सय आठ महिला, २० हजार पाँच सय पुरुष र तीन जना तेस्रो लिङ्गीले चुनावमा मतदान गर्न पाउने बताइएको छ ।

मतदानस्थल र केन्द्र कति छन् ?

निर्वाचन कार्यालयले भक्तपुरमा कूल ७७ मतदानस्थल र दुई सय १९ मतदान केन्द्र निर्धारण गरेको छ । तीमध्ये भक्तपुर नगरपालिकामा १६ मतदानस्थल र ६२ वटा मतदान केन्द्र छन् ।

चाँगुनारायण नगरपालिकामा २१ मतदानस्थल र ५३ वटा मतदान केन्द्र, सूर्यविनायक नगरपालिकामा २३ मतदानस्थल र ५८ वटा मतदान केन्द्र तथा मध्यपुरथिमि नगरपालिकामा १७ मतदानस्थल र ४६ वटा मतदान केन्द्र रहेको कार्यालयले जनाएको छ ।