महिलाको शंकास्पद मृत्युलाई लिएर बुटवल आज पनि अशान्त

चैत ३० गते राति शंकास्पद तवरले मृत्यु भएकी भनिएकी अमृता खत्री टण्डनको शव लुम्बिनी प्रादेशिक अस्पताल बुटवलमा राखिएको छ । तर अहिलेसम्म पोष्टमार्टम हुन सकेको छैन । उनको मृत्यु बालीमा प्रयोग गरिने किटनाशक विषादी डिडिफैक्सको प्रयोगबाट भएको चिकित्सकलाई उद्धृत गर्दै इलाका प्रहरी कार्यालय बुटवलले जनाएको छ ।

बालीनालीमा लाग्ने किराफट्याङग्रा मार्न प्रयोग हुने अत्यन्त घातक उक्त विषादी नेपालमा बिक्री वितरण गर्न बन्देज छ । आज पनि रुपन्देहीको तिलोत्तमा नगरपालिका २, जानकीनगर निवासी अमृताको मृत्युको विषयलाई लिएर बुटवल अशान्त भएको हो ।

विषादीको बट्टा बाहिर नाम नबुझिए पनि उनले दाइलाई म्यासेज गरेको बेलुकी साढे ९ बजेदेखि ३२ मिनेटभित्रको समय र अस्पतालले मृत घोषणा गरेको नौ बजेर पचास मिनेटको समयले पनि कीटनाशक विषादि नै अमृताले प्रयोग गरेको अस्पताल स्रोतलाई उद्धृत गर्दै प्रहरीले बताएको छ ।

अमृताका सासु, ससुरा र श्रीमान् भने अहिले प्रहरीको नियन्त्रणमा छन् । बाहिर हल्ला भएझैँ अमृताका घर पक्षबाट अनुसन्धानलाई प्रभावित पार्ने गरि कुनै दबाब नआएको बताइन्छ । प्रहरीले यस्तो गम्भीर घटनामा कुनै नियत नराखेको उल्लेख गर्दै विपक्ष वा विपक्षमा कुनै कार्य नगरिने इलाका प्रहरी कार्यालय बुटवलका प्रहरी निरीक्षक पंकज चुदालीले बताए ।

उनको घर र माइतको दूरी जम्मा तीन सय मिटर मात्र छ । मृतक अमृतालाई विगतदेखि घरमा ‘टर्चर’ दिएको कुरा पनि छिमेकमा कसै कसैले गरेका छन् । उनले सामान्य फर्नीचर पसलमा जागिर गरे आफ्नो गर्जो टार्दै आएको बताइन्छ ।

घरमा श्रीमानको पनि कमाइ नभएपछि सासु सासुराकै भर पर्नु बाहेक अर्को विकल्प थिएन । कम्तिमा आठ घण्टा ड्युटी गर्दा आफूलाई गुजारा पनि चल्ने र त्यतिञ्जेल मन शान्ति पाउने भन्दै नयाँ मिलको फर्निचर पसलमा रोजगारी गरेको आफन्तहरुले बताएका छन् ।