प्रचण्ड पनि अरु नेतालाई भेट्न घर घरमा
सँधै अन्य नेता तथा कार्यकर्ता माओवादी केन्द्रका अध्यक्ष पुष्पकमल दाहाल प्रचण्डसँग भेटघाट गर्न उहाँको निवास ललितपुरको खुमलटार पुग्ने गर्छन् । प्रधानमन्त्री निवास बालुवाटारमा हुने र यदाकदा सिंहदरबारमा हुने भेटवार्तामा बाहेक उहाँ भेटघाटको निम्ति अन्यत्रको घरमा बिरलै जाने गर्नुभएको छ ।
तर हिजो उहाँले आफ्नै पार्टीका नेता नारायणकाजी श्रेष्ठ र नेकपा एकीकृत समाजवादीका अध्यक्ष माधवकुमार नेपालसँग उहाँहरुको निवासमा पुगेर भेट्नुभएको हो । हिजो बिहान उहाँ नेता श्रेष्ठलाई भेट्न सबेरै निवासबाट निस्कनुभएको थियो । श्रेष्ठको निवासमा अध्यक्ष दाहाल बिहान पौने ८ बजे पुग्नुभएको हो ।
झण्डै ४५ मिनेट भेटवार्ता गरेपछि उहाँ त्यहाँबाट कोटेश्वरतर्फ जानुभएको थियो । कोटेश्वरस्थित नेकपा एकीकृत समाजवादीका अध्यक्ष माधवकुमार नेपालको निवासमा उहाँ ९ बजेको हाराहारीमा पुग्नुभएको बताइन्छ । उहाँहरुबीच करिब २० मिनेट वार्ता भएपछि नेकपाका महासचिव नेत्रविक्रम चन्द विप्लव तीन जनाको टोली सहित त्यहाँ पुग्नुभएको थियो ।
त्यसपछि उहाँहरुबीच नेपाल निवासमा सामूहिक छलफल भएको थियो ।
टिप्पणीहरू