नयाँ दिल्लीमा पनि प्रचण्ड उत्तिकै व्यस्त, भाजपा अध्यक्ष भेट्न मुख्यालयमा

तीन दिने भारत भ्रमणमा रहनुभएका नेकपा माओवादी केन्द्रका अध्यक्ष पुष्पकमल दाहाल प्रचण्ड र भारतीय जनता पार्टी (भाजपा) का अध्यक्ष जेपी नड्डाबीच भेटवार्ता भएको छ ।

भेटमा भारतीय विदेशी मन्त्री एस. जयशंकर र भाजपा विदेश विभाग प्रमुख विजय चौथाईवाला पनि सहभागी थिए । भेटवार्ताको निम्ति प्रचण्ड भाजपाको मुख्यालय पुग्नुभएको हो ।

आजै प्रचण्ड र भारतीय प्रधानमन्त्री नरेन्द्र मोदीबिच भेटवार्ता हुने बताइएको छ । तर समय निश्चित भइसकेको छैन । अस्ति दिल्ली पुग्नुभएका प्रचण्डले हिजो भारतीय प्रधानमन्त्रीका सुरक्षा सल्लाहकार अजित डोभाल र विदेश मन्त्री जयशंकरसँग भेटवार्ता गर्नुभएको थियो ।

उहाँ अध्यक्ष नड्डाको विशेष निमन्त्रणामा भारत भ्रमणमा जानुभएको हो । उहाँ आजै स्वदेश फर्कने कार्यक्रम छ ।