पशु स्वास्थ्य विधेयकमा गम्भीर त्रुटी, भेटेरिनरी डाक्टरहरुको आपत्ति

नेपाल भेटेरिनरी एसोसिएसनले हालै प्रतिनिधिसभामा पेश भएको पशु स्वास्थ्य तथा पशु सेवा विधेयक २०७६ मा गम्भीर त्रुटी भएको आरोप लगाएको छ । एसोसिएसनका अध्यक्ष डा.शीतलकाजी श्रेष्ठले विधेयकमा निकै ठूलो त्रुटी भएको बताएका छन् ।

त्यस्ता त्रुटी सच्याउन माग गर्दै अध्यक्ष डा.श्रेष्ठले पशुपालन क्षेत्रलाई नै तहसनहस हुने ढंगबाट कानुन निर्माण हुनु अन्तर्राष्ट्रिय मूल्य मान्यता विपरित हुने बताए । विधेयकले भेटेरिनरी डाक्टरको आत्मसम्मानमा आँच पुर्याउने काम गरेको जनाउँद उनले भने, ‘विधेयकमा सम्पूर्ण माननीय सांसदहरुको ध्यानाकर्षणको निम्ति गम्भीर तवरले अनुरोधसमेत गर्न चाहन्छु ।‘

स्नातक भेटेरिनरी डाक्टर र अधिकतम ३० महिने डिप्लोमा १० जोड दुई गरेका पशु प्राविधिकहरुले गर्ने पशु चिकित्सकीय काम र अधिकारमा कुनै भिन्नता नराखी उक्त विधेयक ल्याइएको अध्यक्ष डा. श्रेष्ठको दाबी छ ।

अस्ति संसदको कृषि सहकारी तथा प्राकृतिक स्रोत समितिका सभापति पूर्णाकुमारी सुवेदीले प्रतिनिधिसभामा पशु स्वास्थ्य तथा पशु सेवा विधेयक २०७६ पेश गर्नुभएको थियो ।