काठमाडौंमा अमेरिकी अधिकारीहरुको ओइरो

काठमाडौंमा आगामी सातादेखि अमेरिकी उच्च अधिकारीहरुको आगमन बाक्लो हुने भएको छ । आगामी आइतबार दुई दिने भ्रमणमा राजनीतिक मामिला उपमन्त्री भिक्टोरिया नुल्याण्ड आउन लागेकी छन् ।

सो क्रममा उपमन्त्री न्युल्याण्डले राष्ट्रपति विद्यादेवी भण्डारी, प्रधानमन्त्री पुष्पकमल दाहाल,एमाले अध्यक्ष केपी शर्मा ओली,नेपाली काँग्रेसका सभापति शेरबहादुर देउवा, उपप्रधान तथा गृहमन्त्री रवि लामिछाने,उपप्रधान तथा ऊर्जामन्त्री राजेन्द्र लिङ्देन र परराष्ट्रमन्त्री विमला राई पौडेललगायतसँग भेटवार्ता गर्ने कार्यक्रम छ ।

त्यसपछि उपसहायक मन्त्री अफ्रिन अख्तर काठमाडौं आउने कार्यक्रम छ । दक्षिण तथा मध्य एसिया मामिलासम्बन्धी नेपाल, श्रीलंका,बंगलादेश, भुटान र माल्दिभ्स हेर्ने ती उपसहायक मन्त्रीले माघको अन्तिम साता नेपाल भ्रमण गर्ने तालिका छ । अख्तरले सुरक्षा तथा संक्रमणकालीन मामिला कार्यालयको जिम्मेवारीसमेत सम्हालेका छन् ।