बाँकेको जमुनाहा नाका बन्द गरिँदै

बाँके जिल्लासँग सीमाना जोडिएको भारतको उत्तर प्रदेशको बहराइच जिल्लामा यही बैशाख २१ गते हुने नगरपञ्चायतको निर्वाचनका लागि नेपाल–भारत जमुनाहा सीमा नाका बन्द हुने भएको छ । 

खुला सीमाका कारण निर्वाचनका बेला सुरक्षा चुनौती बढ्न सक्ने भएकाले भोलि राति १२ बजेदेखि बैशाख २१ गते बेलुका ६ बजेसम्म नाका पूर्णरुपमा बन्द गरिन लागिएको हो । प्रमुख जिल्ला अधिकारी विपिन अर्यालका अनुसार नाका बन्द गरेर सीमा क्षेत्रको दशगजा क्षेत्रमा दुई देशका सुरक्षाकर्मीले संयुक्त रुपमा गस्ती गर्ने तथा संवेदनशीलता अनुसार काम गर्ने सहमति भएको छ । 

उनले सशस्त्र प्रहरी बल र भारतीय सुरक्षा बल, एसएसबीका स्थानीय अधिकारीबीच संयुक्त गस्तीका लागि छलफल भएको समेत जनाए । त्यस्तै, सीमा सिल गरिएको अवधिमा एम्बुलेन्स, बिहेजन्तीलगायत अत्यावश्यक सेवालाई दुवै देशका सुरक्षाकर्मीको समन्वयमा आउन जान दिइने उनको भनाइ छ । 

प्रमुख जिल्ला अधिकारी अर्यालले बैशाख १९ गतेबाटै दुई देशका सीमा क्षेत्रमा मदिराको बेचबिखन र सेवनमा रोक लगाइने जानकारी दिए ।  नेपाल र भारत दुवै देशमा विभिन्न तहका निर्वाचन हुने समयमा विगत लामो समयदेखि सीमानाका बन्द हुँदै आएको छ ।