नक्कली भुटानी शरणार्थी प्रकरणका अभियुक्त नै अन्यायमा परेको जिकिर

नक्कली भूटानी शरणार्थी प्रकरणका अभियुक्त केशव दुलाल स्वयं पीडित भएकाले उनीविरुद्ध लागेको कसूर प्रमाणित नहुने अधिवक्ताहरुले जिकिर गरेका छन् । 

नेपाली नागरिकलाई अमेरिका पठाउने भन्दै करोडौं असुलेको अभियोगमा संगठित ठगी,राज्यविरुद्धको अपराधसहित चारवटा कसूरमा मुद्दा चलाइएका दुलाल आफैँ ठगीमा परेको भन्दै उनको पक्षबाट बहस गरेका कानुन व्यवसायीहरुले यस्तो जिकिर गरेका हुन् ।  

काठमाडौं जिल्ला अदालतका न्यायाधीश प्रेमप्रसाद न्यौपानेको इजलाशमा आज अभियुक्त दुलालतर्फका ६ जना वकिलले बहस गरेका थिए । त्यसक्रममा अधिवक्ता योगेन्द्रबहादुर अधिकारी,विकास भट्टराई,विकास थापा, विश्वास आचार्य, नरबहादुर योगी र राजन भट्टराईले उनी कसूरदार नरहेको दलिल पेश गरेका छन् ।

उनीहरुले अभियुक्त भनिएका दुलाल आफैं ठगीमा परेर पीडित भएकाले उनीमाथि लगाइएका कुनैपनि अभियोग तथा कसूर प्रमाणित नहुने तर्क गरे । दुलालले गृह मन्त्रालयमा गएर लिखत परिवर्तन गरेको भन्ने आरोपमा सत्यताको आधार के हो भन्दै  अधिवक्ताहरुले इजलाशमा प्रश्नसमेत गरेका थिए । दफा तोकेर आरोप लगाउँदैमा पुष्टि हुन नसक्ने दाबी अधिवक्ता योगेन्द्र अधिकारीको थियो ।

अधिवक्ता विश्वास आचार्यले दुलालको प्रतिरक्षा गर्दै भने-श्रीमानले यो मुद्दामा ठूलो नजिर बन्नेगरी आदेश दिनु हुनेछ भन्ने हाम्रो विश्वास छ । त्यसो भएमा श्रीमानको नाम स्वर्ण अक्षरले लेखिनेछ ।' कानुन व्यवसायीहरुले इजलाशमा दुलाल आफैं अमेरिका जान खोज्दा ठगिएका र अरुलाई ठगेको प्रमाण नभएको  जिकिर गर्दै साधारण तारेखमा छोड्न माग गरेका छन् । 

अहिले अर्का अभियुक्त सानु भण्डारीको तर्फबाट अधिवक्ता विनोद शर्माले बहस प्रारम्भ गरेका छन् । भण्डारीको प्रतिरक्षामा उत्रिएका अधिवक्ता शर्माले शरणार्थी प्रकरण पनि ३३ किलो सुनकाण्ड जस्तै हुने त होइन ? भन्ने प्रश्न गरेका छन् । उनले सुनकाण्डका मुख्य व्यक्ति छाडेर अरुलाई मात्र फसाइएको दृष्टान्त दिँदै यो केशमा त्यसो गर्न नहुने तर्क पेश गरेका थिए ।

३२ जनालाई प्रतिवादी बनाइएको यो मुद्दामा सरकारका तर्फबाट कानुन व्यवसायीहरुले बहस सकिसकेका छन् । आजदेखि प्रतिवादीतर्फका वकिलले प्रतिरक्षा बहस थालेका छन् ।