बालुवाटारमा बसेको सत्तारुढ गठबन्धनले कोशी प्रदेशमा नेपाली काँग्रेसका उद्धव थापालाई मुख्यमन्त्री बनाउने निर्णय गरेको छ ।
प्रधानमन्त्रीको सरकारी निवास, बालुवाटारमा बसेको सत्ता गठबन्धन दलको बैठकले नेपाली काँग्रेस संसदीय दलका नेता थापालाई कोशीको आगामी मुख्यमन्त्री बनाउने निर्णय गरेको हो ।
एमालेका मुख्यमन्त्री हिक्मत कार्कीले अस्ति प्रदेशसभा बैठकमा विश्वासको मत नपाएपछि नयाँ सरकार गठनका लागि प्रदेश प्रमुखले हिजो आह्वान गरेपछि नयाँ मुख्यमन्त्रीको सरगर्मी बढेको हो । नेकपा माओवादीले समेत मुख्यमन्त्रीमा दाबी गरेपछि विषय पेचिलो बनेको थियो ।
प्रदेश सभामा रहेका ९३ सदस्यमध्ये बहुमतका लागि ४७ मत आवश्यक पर्छ । एक सिट रहेको राप्रपाले समर्थन नगरेसम्म सत्तारुढ गठबन्धनका उम्मेदवार थापाको पक्षमा पनि बहुमत पुग्ने सम्भावना छैन ।
