पलेशालाई सरकारको तर्फबाट ६५ लाख रुपैयाँ

सरकारले पारा ओलम्पिकमा नेपाललाई ऐतिहासिक कास्य पदक दिलाउने खेलाडी पलेशा गोवद्र्धनलाई सरकारले ६५ लाख रुपैयाँ पुरस्कार प्रदान गर्ने भएको छ । प्रधानमन्त्री निवास, बालुवाटारमा आज आयोजित बधाई तथा सम्मान कार्यक्रममा प्रधानमन्त्री केपी शर्मा ओलीले कर कटट नगरी ६५ लाख दिइने जानकारी गराउनुभएको छ ।

पेरिस पारालिम्पिक २०२४ मा के–४४ वर्गअन्तर्गत महिला ५७ तौल समूहको प्रतिस्पर्धामा पलेशाले सर्वियाकी मारिजा मिचेभलाई १५–८ ले पराजित गर्दै कास्य जितेकी थिइन् । उनी पारालिम्पिक र हालसम्म विश्वस्तरीय प्रतियोगितामा पदक जित्ने पहिलो नेपाली खेलाडी बनेकी छन् ।

प्रधानमन्त्री ओलीले नेपालबाट कुनै पनि खेलाडीको टोली विश्वस्तरको प्रतिस्पर्धामा जाँदा खेलाडीले केही दिन्छन् कि, केही लिएर आउँछन् कि भनेर आँखा त्यतातिर लगाएर र कान थापेर बस्ने गरेको बताउनुुभयो । ‘नेपालीले मौका पाएपछि गर्छ भनेर मैले भन्दै आएको छु । यस पटक हामीले पारा ओलम्पिकमा उपस्थिति मात्र होइन, हस्तक्षेप र दख्खल दिएका छौँ । पलेशाको जित नेपालीको जित हो । यसले औधी खुशी तुल्याएको छ । नेपालको इज्जत बढाएको छ,’ प्रधानमन्त्री ओलीले भन्नुुभयो ।

उहाँले कीर्तिमान इतिहासमा लेखिने, पुुराना कीर्तिमानहरु तोड्दै जाने र एउटै रेकर्डमा चित्त बुुझाएर नबस्न खेलाडीहरुलाई सुझाउनुभएको छ । अब नेपालको कीर्तिमानको यात्रा सुरु भएको उहाँको भनाई छ । सो अवसरमा उक्त खेलका प्रशिक्षक, व्यवस्थापक र सहभागी खेलाडीलाई पनि प्रधानमन्त्री ओलीले सम्मान गर्नुभएको थियो ।

त्यसअघि पलेशालाई राष्ट्रपति रामचन्द्र पौडेलले पनि शीतल निवासमा सम्मान गर्नुभएको थियो ।