तीन दर्जन सहकारीबाट ८७ अर्ब ठगी, गोरखा मिडियामा ८५ करोड लगानी

सहकारी संस्था बचत रकम दुरुपयोग सम्बन्धमा छानबिन गर्न गठित संसदीय विशेष समितिले प्रतिवेदन संसदमा पेश गरेको छ । समिति सभापति सूर्यबहादुर थापाले आज प्रतिनिधिसभा बैठकमा प्रतिवेदन प्रस्तुत गरेका हुन् । 

गत जेठ १५ गते गठन भएको समितिले करिब सय दिनको अनुसन्धानपछि प्रतिवेदन तयार पारेको हो । सो क्रममा ६६ वटा बैठक बसेको, ५५ जनासँग सोधपुछ र ४५१ जनासँग परामर्श गरिएको सभापति थापाले जानकारी गराए । 

त्यस्तै उनले ४० वटा सहकारीको वित्तीय विश्लेषण गरिएको पनि बताएका छन् । ती सहकारीबाट ८७ अर्ब रुपैयाँ ठगी भएको उनको भनाई छ । 

गोर्खा मिडिया नेटवर्क प्रालिमा विभिन्न सहकारीबाट ८५ करोड लगानी गरिएको थापाले जानकारी दिए । ‘त्यो सबै रकम सहकारीबाट ल्याइएको छ, अन्त कतैबाट रकम ल्याइएको छैन’, उनले भने, ’त्यससम्बमा हामीले ८ वटा सुझाव पनि प्रतिवेदनमा राखेका छौं ।’

सभापति थापाले कतिपय सहकारीका सञ्चालकहरुको कारण प्रतिष्ठित व्यक्तिलाई समेत हैरानी दिएको बताए । गायक रामकृष्ण ढकालको प्रसंग निकाल्दै भने, ‘गायक रामकृष्ण ढकाल फेक ऋणीको रुपमा प्रताडित हुनुहुन्छ । उहाँ जस्ता धेरै प्रतिष्ठित व्यक्तिहरु ठगीको शिकार हुनु भएको छ ।’

उक्त प्रतिवेदन प्रतिनिधिसभाले आवश्यक कार्यन्वयनका लागि आजै सरकारलाई पठाएको छ ।