अमेरिकाले अघि सारेको धार्मिक नीतिप्रति विप्लवको आक्रोश

नेत्रविक्रम चन्द्र विप्लव नेतृत्वको नेपाल कम्युनिष्ट पार्टीले अमेरिकी सरकारले अघि सारेको अन्तर्राष्ट्रिय धार्मिक नीतिप्रति विरोध जनाएको छ । 

सो पार्टीको अन्तर्राष्ट्रिय विभाग सदस्य खगेश्वर सीले आज विज्ञप्ति जारी गर्दै अमेरिकाले अन्तर्राष्ट्रियस्तरमा धार्मिक सम्प्रदायबीच वैमनस्यता सिर्जना गर्ने अभिप्रायले 'अन्तर्राष्ट्रिय धार्मिक स्वतन्त्रता तथा विश्वास अलिएशन' नामक सञ्जाल खडा गरेको बताएका छन् । 

‘अमेरिकाले जसरी धार्मिक स्वतन्त्रताको प्रचार गरेको छ । वास्तवमा त्यो जनताको धर्मप्रतिको स्वभाविक चिन्ता नभएर कथित अमेरिकी स्वार्थ पुरा गर्न अघि सारिएको धर्म राजनीति हो,’ विज्ञप्तिमा भनिएको छ, ‘यसले अन्य देशको सार्वभौमिकता, स्वतन्त्रता, आन्तरिक मामिला र मौलिम संस्कृतिमा हस्तक्षेप गर्ने मात्र नभई देशहरुमा अराजकता सिर्जना गर्दै धार्मिक असहिष्णुता निम्त्याउँछ ।’

यो अमेरिकी भूमण्डलीकृत साम्राज्यवादी नीति लागू गर्ने हस्तक्षेपकारी कदम भएको उल्लेख गर्दै यसले नेपालको स्वाधीनता, परम्परा र नेपालीजनका स्थानीय रितिरिजाव एवं संस्कारलाई तहसनहस पार्ने उसको ठहर छ । 

अमेरिकाको यस्तो कुटिल चालबाट जनतालाई सचेत रहन पनि अपिल गरिएको छ ।