सेबोन अध्यक्षका 'बहिष्कारवादी उम्मेदवार' लाई फेरि बोलाइयो

नेपाल धितोपत्र बोर्ड (सेबोन)को अध्यक्षका लागि आवेदन दिई सर्ट लिष्टमा परेका तर अन्तर्वार्ता 'बहिष्कार' गर्दै आएका ३ उम्मेदवारलाई फेरि अन्तर्वार्तामा बोलाएको छ । 

बोर्डको अध्यक्ष नियुक्त गर्न गठित सिफारिस समितिले आज सार्वजनिक सूचना निकालेर डा. नवराज अधिकारी, चिरञ्जीवी चापागाईँ र कृष्णबहादुर कार्कीलाई अन्तरवार्तामा आउन भनेको हो । उनीहरुलाई व्यावसायिक कार्ययोजना प्रस्तुतीकरण र अन्तरवार्ताका लागि बोलाएको समितिले जनाएको छ । 

तीनै जनालाई आगामी मंसिर ९ गते बिहान ८ बजे सिंहदरबारस्थित अर्थ मन्त्रालयमा उपस्थित हुन भनिएको छ । यसअघि गत असोज १८ गते प्रस्तुतीकरण र अन्तरवार्ताका लागि बोलाएपनि तीनैजना अनुपस्थित भएपछि अन्तिम समयमा स्थगित गरिएको थियो । अर्थ मन्त्रालयले विशेष कारणवश अन्तरवार्ता रोक्नुपरेको बताएको थियो । 

असारमा सर्ट लिस्टमा परेका पाँच जनालाई अन्तरवार्ताका लागि बोलाइएपनि दुई जनामात्र उपस्थित भएका थिए । तीनजना प्रस्तुतीकरण र अन्तरवार्तामा सहभागी नभएपछि सिफारिस समितिले नाम सिफारिस गर्न सकेन । 

धितोपत्रको कार्यकारी अध्यक्ष बनाएर हिमालयन स्टक एक्सचेञ्जको स्वीकृति लिने योजनामा पहिलो नम्बरमा सन्तोषनारायण श्रेष्ठ र दोस्रो नम्बरमा मुक्ति श्रेष्ठलाई दिपक भट्टको समूहले अघि सारेपछि माओवादी निकट भनिएका अधिकारी, चापागाईं र कार्की ‘योजनाबद्ध’ रुपमा अन्तर्वार्तामा अनुपस्थित भएको त्यसबेला चर्चा थियो । तत्कालीन प्रधानमन्त्री प्रचण्ड र अर्थमन्त्री वर्षमान पुनलाई दबाब दिएर केपी शर्मा ओलीको चाहनाअनुसार त्यस्तो सेटिङ मिलाइएको माओवादी पक्षको दाबी रहँदै आएको छ ।  

तीनजनाले अन्तर्वार्ता बहिष्कार गरेपछि सरकारले नयाँ प्रक्रिया शुरु गर्न समिति बनाएसँगै त्यसविरुद्ध सर्ट लिस्टमा परेका श्रेष्ठ सर्वोच्च अदालत पुगेका थिए । धितोपत्र बोर्ड ०८० पुस २० गतेदेखि अध्यक्षविहीन छ ।