धादिङमै प्रधानमन्त्रीका मान्छेबीच दुई धार

पार्टी नेतृत्वमा एकलौटी हावी हुँदाहुँदै पनि गुटबन्दी रुचाउने एमाले अध्यक्ष केपी शर्मा ओली समर्थकबीच नै जिल्ला–जिल्लामा उपगुट देखा पर्न थालेका छन् । यसको ताजा उदाहरण धादिङ एमालेलाई लिन सकिन्छ । स्रोतका अनुसार त्यहाँका दुवै गुट अध्यक्ष ओली समर्थक र पक्षधर मानिए पनि त्यसभित्रै उपगुट देखिएको छ । जसमध्ये एक गुटको नेतृत्व अध्यक्ष भूमि त्रिपाठी र अर्को खेमाको केन्द्रीय सदस्य खेम लोहनीले गरेका छन् ।

लोहनी खेमालाई  बागमती प्रदेश अध्यक्ष कैलाश ढुंगेल (रामेछाप) पक्षको समर्थन छ । यो गुटमा १५ प्रतिशत मात्रै देखिएका छन् । बाँकी त्रिपाठीतिर छन् । त्रिपाठीलाई जिल्ला अध्यक्षमा उपाध्यक्ष सुरेन्द्र पाण्डेको दश भाइ भनिने गुटले काँध थापेको थियो । त्यसबखत त्रिपाठी मुश्किलले २६ भोटको अन्तरमा उम्किएका थिए । दश भाइको समर्थन नपाएको भए उनी त्यसबेला डा. रामकुमार अधिकारीसँग पराजित हुन्थे । त्यसो त त्रिपाठी युवाहरूमाझ लोकप्रिय पनि छन् । 

यसबीच, उनले पूर्वराष्ट्रपति विद्यादेवी भण्डारी समर्थकबाट सहयोग खोजे पनि पाउन सकेका छैनन् । सचिवालयमा त्रिपाठी पक्षको झिनो बहुमत मात्रै छ । यस समूहमा मीनराज कँडेल, देवप्रसाद त्रिपाठी, जगन्नाथ तिमिल्सिना, मैदी गाउँपालिकाको अध्यक्षमा पराजित रामप्रसाद सिलवाल र साना किसान सहकारीका अध्यक्ष खेम पाठकलगायत छन् । अध्यक्षको चुनावमा त्रिपाठीसँग पराजित डा. रामकुमार अधिकारी पनि सुरेन्द्र पाण्डेकै खेमामा मिसिएका छन् । अधिकारी केपी ओलीको हुन सकेनन् । यतातिर पुराना र चिनिएका एमाले धेरै छन् ।खेम लोहनीको साथमा अध्यक्ष तथा प्रधानमन्त्री केपी ओलीका पूर्वपिए रमेश आचार्य, नीलकण्ठका अर्जुन गोर्खाली, राधिका सापकोटालगायत रहेको बताइन्छ । सापकोटा धादिङ पत्रकार महासंघका अध्यक्ष सीताराम अधिकारीकी पत्नी हुन् । 

त्यसैगरी, भूमि आयोगको अध्यक्षमा दोहोर्‍याउने आश्वासनसहित एकीकृत समाजवादीबाट प्रवेश गराइएका कृष्ण अर्याल जिल्याइएका छन् । जसरी भए पनि तपाईंलाई अध्यक्ष बनाउँछु भन्दै पार्टी प्रवेशको लागि वातावरण तयार गर्ने त्रिपाठी आश्वासन पूरा गर्न असफल देखिए । अर्याललाई अध्यक्ष बनाउने त्रिपाठीको प्रयासलाई काउण्टर दिँदै लोहनी र रमेश आचार्य खेमाले हरि पन्तलाई नियुक्त गराइदियो । 

प्रचण्ड धादिङबाट उठ्ने ?

नेकपा (माओवादी केन्द्र)का अध्यक्ष तथा पूर्वप्रधानमन्त्री पुष्पकमल दाहालले प्रचण्ड चितवन, सिरहा, गोर्खा हुँदै २०८४ सालको आमनिर्वाचनमा धादिङबाट प्रतिनिधिसभा निर्वाचन लड्ने तयारी गरिरहेको बुझिएको छ । अध्यक्ष प्रचण्ड धादिङ जिल्लामा पर्ने राजमार्ग आसपासका नगर तथा गाउँपालिकामा बारम्बार आतेजाते गरिरहेकाले यस्तो लख काटिएको हो । प्रचण्ड लड्ने निर्वाचन क्षेत्रअन्तर्गत बेनीघाट रोराङ, गजुरी, धुनिबेँशी, थाँक्रेलगायत ठाउँ छन् । अहिले सांगठानिक रूपमा धादिङका ४ गाउँपालिकामा माओवादी केन्द्रको शक्ति सुदृढ मानिन्छ । उसलाई नेकपा (एकीकृत समाजवादी)सँगको सहकार्यले राम्रो फाइदा पुगेको छ । धादिङमा स्ववियुको निर्वाचन अखिल क्रान्तिकारी र एकीकृत समाजवादी मिलेरै लडेका छन् । 

एमालेभित्र देखिएको उपगुट र कांग्रेसभित्र विभिन्न गुटका कारण धादिङमा माओवादी केन्द्र बलियो देखिन थालेको छ । हाइवे क्षेत्रबाट माओवादीका शालिग्राम जमरकट्टेलले एकीकृत समाजवादीका राजेन्द्र पाण्डेलाई २०६४ सालमा हराएका थिए । २०७९ सालको आम निर्वाचनमा भने पाण्डे ३४ हजार मत ल्याएर विजयी भए । बेनीघाट रोराङ, मलेखु र ताल्ती माओवादी केन्द्रले जितेका क्षेत्र हुन् । एमालेले बैरेनी र गल्छीको अध्यक्ष मात्रै जितेको छ भने धुनिवेंशीमा एकीकृत समाजवादीका मेयर छन् ।