बृद्ध पितालाई स्याहार्न राजीनामा दिने मुडमा थिए दिवंगत क्याप्टेन

गतसाता भारतको अहमदावाद विमानस्थल नजिकैको भयंकर विमान दुर्घटनामा बितेका क्याप्टेन आफ्ना बृद्धपितालाई स्याहार्न जागिर छाड्ने  मुडमा थिए । अविवाहित क्याप्टेन सुमित सबरवाल वृद्ध पिताका एक्लो छोरा हुन् । बुबासँगै रहेका उनी वृद्ध अवस्थामा स्याहार सुसारका लागि जागिर छाड्ने सुरमा थिए । तर, गतसाताको दुर्घटनामा उनीसहित २७४ जनाले ज्यान गुमाएका छन् ।

भारतीय अधिकारीहरुका अनुसार  चालक दलका १२ जना र यात्रु एकजना बाहेक अरु सबै २४१ जना बितेका छन् । आवासीय क्षेत्रमा खसेको उक्त विमान दुर्घटनामा जमिन र भवनमा रहेका अन्य ३३ जनाको पनि ज्यान गएको छ ।

विमानको ब्ल्याक बक्स र फ्लाइट डेटा रेकर्डर फेला परेको छ । उडेको केही सेकेण्डमै विमानको पछाडिको टेल नजिकैको भवनमा ठोक्किएपछि अगाडिको बाँकी भाग अतातुल्यम कम्प्लेक्सको ३ नम्बर भवन छेउमा पुगेर जलेको थियोे । टेल ठोक्किएको भवन र कम्प्लेक्स वरपर रहेकामध्ये ३३ जना आगोमा परेको अधिकारीहरुको भनाइ छ ।

विमान मेघानी नगरको बीजे मेडिकल कलेजको होस्टेल मेस रहेको भवनमा ठोक्किएपछि भुइँमा झरेको थियो । जहाँ एमबीबीएस अध्ययनरत विद्यार्थीहरुको क्यान्टिन थियो । 

सरदार बल्लभ भाइ पटेल विमानस्थलबाट दिउँसो १.२८ बजे उडेको विमान १६ सय मीटर पर खसेको हो । बेलायतको राजधानी लण्डनस्थित ग्याटविकतर्फ उडेको एअर इण्डियाको एआई १७१ उडानको बोइङ ड्रिमलाइनर विमान दुर्घटनामा परेका ३३ जनामध्ये अधिकांश एमबीबीएस अध्ययनरत विद्यार्थी भएको जनाइएको छ ।

दिवंगत क्याप्टेन सुमितसँग आठ हजार २०० घण्टाको र कोपाइलट कुन्दरसँग एक हजार १०० घण्टाको उडान अनुभव थियो । रनवे २३ बाट प्रस्थान गरेलगत्तै विमान विमानस्थल बाहिरको जमिनमा खस्नुअघि क्याप्टेनले आपतकालीन अवस्थाबारे जानकारी गराउँदा गराउँदै टावरसँग सम्पर्क बिच्छेद भएको बताइन्छ ।