लोकेश नेतृत्वको आरआर स्ववियुले पायो वैधानिकता

काठमाण्डौको प्रदर्शनीमार्ग स्थित रत्नराज्य लक्ष्मी क्याम्पस (आरआर) को स्वतन्त्र विद्यार्थी यूनियन (स्ववियु) सम्बन्धी लामो समयदेखि चल्दै आएको विवाद टुंगोमा पुगेको छ । उच्च अदालत पाटनले रिट खारेज गर्दै स्ववियुलाई पूर्ण रुपमा वैधानिकता प्रदान गरेको हो ।

विनोदराज जोशी र रविनराज खत्रीले दायर गरेको रिटमाथि सुनुवाइ गर्दै अदालतले दुवै रिट खारेज गरेको छ । वादीहरुले स्ववियु गठनमा आफूहरुलाई समावेश नगरिएको र प्रक्रियागत त्रुटि भएको दाबी गर्दै रिट दायर गरेका थिए ।

नेविसंघका  असन्तुष्ट समूहले आफूहरुको जानकारी विना स्ववियु समिति घोषणा गरिएको आरोप लगाउँदै रिट दायर गरेका थिए । तर,अदालतले माग अनुरूप स्ववियु खारेज गर्नुपर्ने कुनै वैधानिक आधार नभएको ठहर गरेको छ।

यो फैसलासँगै स्ववियु अध्यक्ष लोकेशकुमार खड्का नेतृत्वमा रहेको वर्तमान स्ववियुले विधिवत रूपमा आफ्नो कार्यकाल अगाडि बढाउन पाउने छ ।

यसअघि स्ववियु गठन प्रक्रियामै असहमति जनाउँदै केही समूहले निरन्तर विवाद गर्दै आएका थिए । अदालतको आदेशसँगै अब स्ववियु आफ्ना नियमित काममा अघि बढ्ने स्ववियु अध्यक्ष लोकेशकुमार खड्काले बताए ।