प्रस्तावित न्यायाधीशले निष्पक्ष न्याय दिनेमा शंका

प्रमुख प्रतिपक्ष नेकपा माओवादी केन्द्रका उपमहासचिव जनार्दन शर्माले प्रस्तावित न्यायाधीश मेघराज पोखरेललाई न्यायाधीश भएपछि निष्पक्ष न्याय गर्छु भन्ने आधार के छ ? भनी प्रश्न सोधेका छन् ।

आज संसदीय सुनुवाई समितिको बैठकमा उनले न्यायाधीश नियुक्त भए निष्पक्षरूपमा न्याय सम्पादन गर्ने विश्वास दिलाउन भनेका हुन् । केही समय अघिसम्म नेपाल बारको अध्यक्ष रहेको व्यक्तिले निष्पक्ष न्याय दिने कुरामा प्रश्न उठ्ने शर्माको भनाइ रह्यो ।

बार स्वतन्त्र हुनुपर्ने भएपनि राजनीतिक पक्षधरता रहने गरेको उल्लेख गर्दै उनले पोखरेललाई न्यायाधीश बनाउन लागिएकोप्रति घुमाउरो असन्तुष्टि जनाए । त्यस्तै उनले मुद्दाको सुनुवाई ढिलो गर्दा न्याय हुन्छ ? भनेर पनि प्रश्न सोधेका छन् ।

शर्माले भने, ‘मैले बुझेको बार भनेको राजनीतिक धारासँग जोडिएर प्रतिष्पर्धा हुने गरेको संस्था हो । स्वतन्त्र बार देखिरहेको छैन । हुनुपर्ने त स्वतन्त्र थियो । त्यसभित्र राजनीतिक पक्षधरताको कुरा छ । राजनीतिक पक्षधरताबाट टर्मिनेट भएको कुरा भन्नुभएको छ तर साँच्चि नै निष्पक्ष हुन्छ त ? यो प्रश्न उठ्न सक्छ । कतिपय मुद्दाहरु सुनुवाई नै नगरिदिने भयो । सुनुवाई गर्दा न्याय गर्नेले न्याय पाउँछ, ढिलो गर्दा न्याय हुन्छ त ? यो कर्तव्य हो त ? यि व्यवहार छन् ।’