भक्तपुरमा मोही बाँडफाँड, मालपोतमा २८ लाख छ्याकन

घुससहित समातिएका भूमिसुधार तथा मालपोत कार्यालय भक्तपुरका प्रमुख मालपोत अधिकृत कुमार आचार्यसहित दुई जनाउपर भ्रष्टाचार मुद्दा दायर भएको छ । 

अख्तियार दुरुपयोग अनुसन्धान आयोगले आज विशेष अदालत काठमाडौंमा उनीहरुविरुद्ध मुद्दा दर्ता गरेको हो । मुद्दा दर्ता हुनेमा आचार्य र कार्यालय सहयोगी टिकाराम राउत छन् । 

आयोगको टंगालबाट खटिएको टोलीले गत असार ३१ गते उनीहरुलाई साढे २४ लाख रुपैयाँ घुससहित नियन्त्रणमा लिएको थियो । 

अनुसन्धानको क्रममा चाँगुनारायण नगरपालिकामा रहेको १४ रोपनी ४ आना जग्गाको मोही बाँडफाँड तथा नामसारीमा सहजीकरण गरी जग्गाधनी दर्ता प्रमाणपूर्जा बनाइदिने प्रयोजनार्थ घुस लिएको खुलेको अख्तियारको ठहर छ । 

अख्तियारले भ्रष्टाचार निवारण ऐन, २०५९ को दफा ३ बमोजिम २४ लाख ५० हजार रुपैयाँ बिगो कायम गर्दै कैद र जरिवाना हुन मागदाबीसहित उनीहरुविरुद्ध मुद्दा चलाएको हो ।