‘स्वमूल्याङ्कन कार्यविधि एकदलीय निरङ्कुशताको पूर्वाभ्यास’

प्रमुख प्रतिपक्ष दल नेकपा माओवादी केन्द्रका सांसद श्रीकृष्णप्रसाद अधिकारीले निर्वाचन आयोगको प्रस्तावित राजनीतिक दलसम्बन्धी स्वमूल्याङ्कन कार्यविधिलाई बहुदलीय व्यवस्थामाथि अंकुश लगाउने प्रयासका रूपमा अर्थ्याएका छन् । 

आज राष्ट्रिय सभाको बैठकमा बोल्दै उनले उक्त कार्यविधिको मस्यौदा साना दलहरूको स्वतन्त्रता समाप्त पार्ने र एकदलीय निरङ्कुशता पुनःस्थापित गर्ने उद्देश्यप्रेरित रहेको दाबी गरे । निर्वाचन आयोगजस्तो स्वतन्त्र र निष्पक्ष संस्थाबाट यस्तो मस्यौदा आउनु लोकतान्त्रिक मूल्य र प्रणालीमाथिको प्रत्यक्ष प्रहार हो भन्ने टिप्पणी सांसद अधिकारीको छ । 

‘दलीय स्वतन्त्रता र राजनीतिक दलहरुबीचको स्वतन्त्र प्रतिस्पर्धामाथि अंकुश लगाएर हिजोकै एकदलीय निरङ्कुशताको हस्को आउनेगरी साना दलहरुको स्वतन्त्रता छिनेर समाप्त पार्ने हेतुले निर्वाचन आयोगजस्तो स्वतन्त्र र निष्पक्ष रहनुपर्ने संस्थाद्वारा स्वमूल्याङ्कन कार्यविधि मस्यौदा आएको छ’, उनले भने । 

राजनीतिक दल सञ्चालन ऐन, २०६३ को दफा ६१ लाई आधार बनाएर यो कार्यविधि ल्याइएको भनिए पनि त्यसअनुकूल नरहेको अधिकारीको भनाइ छ । कार्यविधि मस्यौदामा ऐन विपरीत प्रशासनिक संरचना खडा गर्ने र सेवा–सुविधा तोक्ने प्रस्ताव रहेको भन्दै उनले आपत्ति जनाए । 

‘राजनीतिक दल सञ्चालन ऐन, २०६३ को दफा ६१ लाई आधार बनाएर मस्यौदा ल्याएको भनिएको छ । तर राजनीतिक दल सञ्चालन ऐनमा सो ऐन कार्यान्वयनका लागि मात्र कार्यविधि र निर्देशिका बनाउन सक्ने प्रावधान छ’, सांसद अधिकारीले भने, ‘छुट्टै उद्देश्य र प्रयोजनका लागि कार्यविधि र निर्देशिका बनाउन यो ऐनले छुट दिएको छैन । विधायन ऐन विपरित प्रत्योजित विधायनलाई प्रत्योजन गरेर प्रशासनिक संरचना खडा गरी छुट्टै सेवा सुविधा तोक्ने जस्ता विपरित कार्यहरु मस्यौदामा प्रस्ताव आएका छन् ।’