ट्याक्सीभित्र चितुवाको छाला

प्रहरीले ललितपुरको पुल्चोकमा गुडिरहेको एउटा ट्याक्सी रोकेर चेक जाँच गर्ने क्रममा चितुवाको छाला फेला परेको छ । बा.२ ज ४९५१ नम्बरको ट्याक्सीमा चढेका यात्रु नरबहादुर गौतमको साथबाट उक्त छाला भेटिएको हो ।

यामप्रसाद हर्मेलले चलाएको ट्याक्सीमा गौतमले सिमेण्टको बोरामा कालो प्लाष्टिकले बेरेर राखेको ७ फिट ३ इञ्च लम्बाई, ३ फिट ९ इञ्च चौंडाई भएको चितुवाको छाला बिक्रीको लागि लैजाँदै गर्दा फेला परेको प्रहरीले जनाएको छ ।

महानगरीय प्रहरी परिसर, ललितपुरका प्रवक्ता एवम् सूचना अधिकारी प्रहरी उपरीक्षक सिध्दिविक्रम शाहका अनुसार बागलुङ जिल्ला तमान गाउँपालिका ४ स्थायी घर भई हाल सामाखुसीमा डेरा गरी बस्ने २७ वर्षका गौतमको साथबाट उक्त चितुवाको छालाका साथै एक थान प्याड मोबाइल पनि बरामद भएको छ । उनीमाथि थप अनुसन्धान भइरहेको बताइएको छ ।