भारतीय आधार कार्ड देखाउँदै क्यासिनोमा जुवा खेल्ने नेपाली समातिए

भारतीय आधार कार्डसहित क्यासिनोमा जुवा खेल्ने दुई जना नेपाली नागरिक पक्राउ परेका छन् । महानगरीय प्रहरी वृत्त दरवारमार्गका प्रहरी नायव उपरीक्षकसमेतको टोलीले गए मध्यरातमा ठमेलको होटल अलफ्टमा रहेको वाल्डो क्यासिनोबाट उनीहरु पक्राउ परेका हुन् ।

क्यासिनोका ३० टेबलमध्ये ११४ नम्बरको टेबलबाट उनीहरु पक्राउ परेका हुन् । पक्राउ पर्नेमा सुनसरीको बकलौरी घर भएको चक्रबहादुर कार्कीको छोरा वर्ष ४६ को मदन कार्की र सर्लाहीको ढुंग्रेखोला घर भएका दावा सिंह दोर्जेको छोरा वर्ष ३३ को वबिरमान भोलन हुन् ।

उनीहरुको साथबाट क्यासिनोमा प्रयोग गरिने क्वाइन पहेँलो रंगको ५० हजार रुपैयाँको एक थान, १० हजार रुपैयाँ को कालो रंगको क्वाइन तीन थान, पाँच हजार रुपैयाँको नीलो क्वाइन दुई थान र एक हजार रुपैयाँको क्वाइन नौ थान गरी ९९ हजारको क्वाइन फेला परेको छ । साथै भारतीय नक्कली आधार कार्ड दुई थान र उक्त क्वाइन प्रहरीले बरामद गरेको छ ।

उनीहरुलाई राति नै पक्राउ गरी आज काठमाडौ जिल्ला सरकारी वकिल कार्यालय बबरमहल मार्फत् जिल्ला प्रशासन कार्यालय काठमाडौबाट जुवा ऐनमा पाँच दिनको म्याद थपेर अनुसन्धान थालिएको प्रहरीले बताएको छ ।

निजहरुको साथमा प्राप्त मानव शर्मा र वीर भुटीया नामको भारतीय आधार कार्ड नक्कली भएको प्रहरीले आशंका गरेको छ ।