ठेकेदारले चुनावमा उठ्न नपाउने
निर्वाचन आयोगले आउँदो ३० वैशाखमा हुने स्थानीय तह निर्वाचनमा ठेक्कापट्टा वा चलअचल सम्पत्तिसम्बन्धी व्यवहारमा संलग्न व्यक्तिले उम्मेदवारी दिन नपाउने निर्देशिका ल्याएको छ ।
आयोगको बुधबार बसेको बैठकले स्थानीय तहसँग सम्बन्धित कानुनी तथा कार्यविधिगत व्यवस्थालाई व्यवस्थित गर्न जारी गरेको स्थानीय तह निर्वाचन निर्देशिका, २०७९ मा सरकारी कोषबाट पारिश्रमिक वा आर्थिक सुविधा पाउने गरी कुनै लाभको पद धारण नगरेको, ठेक्कापट्टा वा चल अचल सम्पत्तिसम्बन्धी व्यवहारमा संलग्न नरहेको लगायत १८ वटा मापदण्डभित्र पर्ने व्यक्तिले मात्रै उम्मेदवारी दिन पाउने व्यवस्था गरिएको छ । स्थानीय तहलाई कुनै जिन्सी वा नगदी बुझाउन बाँकी रहेकाले पनि उम्मेदवार बन्न नपाउने निर्देशिकामा भनिएको छ ।
त्यस्तै,उम्मेदवारले मनोनयनपत्रसहित स्वघोषणापत्र पनि बुझाउनुपर्ने निर्देशिकामा उल्लेख छ । २१ वर्ष उमेर पूरा भएको र सम्बन्धित वडाको मतदाता नामावलीमा नाम समावेश भएको पनि हुनुपर्ने निर्देशिकामा जनाइएको छ । आयोगले संघ तथा प्रदेशको समानुपातिक सांसदको सूचीमा नाम कायम रहेकालाई पनि स्थानीय तह निर्वाचनमा उम्मेदवार बन्न रोक लगाएको छ ।
आयोगले जारी गरेको विज्ञप्ति
निर्वाचन आयोगले आज मिति २०७८/१२/१६ गतेको बैठकले स्थानीय तहसँग सम्बन्धित कानूनी तथा कार्यविधिगत व्यवस्थालाई व्यवस्थित गर्न स्थानीय तह निर्वाचन निर्देशिका, २०७९ जारी गरेको छ । निर्देशिकामा निर्वाचन अधिकृत सम्बन्धी व्यवस्था, मुख्य निर्वाचन अधिकृत, निर्वाचन अधिकृत, मतदान अधिकृत तथा कर्मचारी सम्बन्धी व्यवस्था, निर्वाचनसँग सम्बन्धित सरोकारवालाहरुको काम, कर्तव्य र अधिकार, उम्मेदवारको योग्यता तथा मनोनयन, मतदाता नामावली, मतदान र मतगणना सम्बन्धी व्यवस्था लगायत निर्वाचनको प्रभावकारी व्यवस्थापनको निम्ति आवश्यक विषयहरु समावेश गरिएका छन् ।
आयोगले नेपालको संविधान तथा निर्वाचनसम्बन्धी प्रचलित कानुनी व्यवस्था समेतको आधारमा स्थानीय तह निर्वाचनमा उम्मेदवार हुने प्रचलित कानुनबमोजिम योग्यता पुगेको कुनै पनि व्यक्तिले मनोनयन दर्ता गर्दा स्वघोषणा गर्नुपर्ने र आफूले गरेको स्वघोषणाप्रति उम्मेदवार स्वयं जिम्मेवार हुनुपर्ने नयाँ व्यवस्था गरेको छ । उम्मेदवारको मनोनयनपत्र साथ पेस गर्नुपर्ने स्वघोषणा पत्रमा देहायका बुँदाहरु समावेश गरिएका छन् ।
(क) नेपालको संविधानप्रति पूर्ण निष्ठावान रहेको ।
(ख) एक्काइस वर्ष उमेर पूरा भएको नेपाली नागरिक भएको ।
(ग) गाउँपालिका वा नगरपालिकाको सम्बन्धित वडाको मतदाता नामावलीमा नाम समावेश भएको ।
(घ) स्थानीय तह निर्वाचनसम्बन्धी कुनै कानूनले अयोग्य नभएको ।
(ङ) नेपाल सरकार,प्रदेश सरकार वा स्थानीय तह तथा नेपाल सरकार, प्रदेश सरकार वा स्थानीय तहको स्वामित्व वा नियन्त्रणमा रहेको वा नेपाल सरकार, प्रदेश सरकार वा स्थानीय तहबाट अनुदान प्राप्त संस्थामा पारिश्रमिक वा सुविधा पाउने गरी बहाल नरहेको ।
(च) सरकारी कोषबाट पारिश्रमिक वा आर्थिक सुविधा पाउने गरी कुनै लाभको पद धारण नगरेको ।
(छ) स्थानीय तह निर्वाचन ऐन, २०७३ को दफा १३ को खण्ड (ङ), (च), (छ), (ज), (झ), (ज) र (ठ)बमोजिमको अयोग्यता नभएको ।
(ज) स्थानीय तह निर्वाचन ऐन, २०७३, स्थानीय तह निर्वाचन नियमावली, २०७४ तथा स्थानीय तह निर्वाचन निर्देशिका, २०७८ बमोजिम मनोनयनपत्र साथ उम्मेदवारले पेश गर्नुपर्ने सबै कागजात पेस गरेको ।
(झ) प्रतिनिधि सभा सदस्य वा प्रदेश सभा सदस्यको समानुपातिक निर्वाचन प्रणाली तर्फको उम्मेदवारको बन्दसूचीमा नाम कायम नरहेको ।
(ञ) मनोनयनपत्र साथ पेस गरेको सम्पत्ति विवरण ठीक साँचो रहेको ।
(ट) स्थानीय तहलाई कुनै जिन्सी वा नगदी बुझाउन बाँकी नरहेको ।
(ठ) कुनै स्थानीय तहको ठेक्कापट्टा वा चल अचलसम्पत्तिसम्बन्धी व्यवहारमा संलग्न नरहेको ।
(ड) सरकारी पेश्की,बेरुजु तिर्न बुझाउन बाँकी नरहेको ।
(ढ) संविधानको धारा २९१ बमोजिम विदेशको स्थायी आवासीय अनुमति पत्र (डिभी पीआर) नलिएको ।
(ण) न्यायिक वा अर्धन्यायिक निकायबाट लागेको कैद सजाय, जरिवाना तिर्न बुझाउन बाँकी नरहेको ।
(त) निर्वाचन आयोगले जारी गरेको निर्वाचन आचारसंहिता पूर्णरुपमा पालना गर्ने प्रतिबद्ध रहेको। .
(थ) निर्वाचन आयोगले तोकिदिएको निर्वाचन खर्चको सीमाभित्र रही खर्च गर्न र खर्चसम्बन्धी आचरण पालना गर्न प्रतिबद्ध रहेको ।
(द) २१ वर्ष उमेर पूरा भएकोले स्थानीय निर्वाचनमा उम्मेदवार हुन योग्य नेपाली नागरिक भएको ।
(ध) नेपालको संविधान, कानून र निर्वाचन ऐन नियम भित्र रही निर्वाचनमा भाग लिन प्रतिवद्ध रहेको ।
उपरोक्त बमोजिमको स्वघोषणा पत्रमा उम्मेदवारले सम्पूर्ण विवरण ठीक साँचो रहेको र झुठा ठहरे कानून बमोजिम सहन बुझाउन प्रतिवद्ध रहेको घोषणा गर्नुपर्नेछ ।
टिप्पणीहरू