‘माओवादीले भाँचेको यहि हातले कसरी हँसिया हथौडामा भोट हाल्नु ?’

सत्ता गठबन्धन संयन्त्रले आउँदो स्थानीय तहको निर्वाचनमा सत्ता घटकलाई एक ठाउँमा उभिन निर्देशन दिइसकेको छ । तर जिल्लामा चुनावी गठबन्धनको गाँठो भने अझै फुक्न सकेको छैन । त्यसको कारण– नेपाली काँग्रेस, माओवादी केन्द्र र एकीकृत समाजवादीका तल्लो कमिटीका नेता–कार्यकर्ताहरूको मन अझै एक नहुनु हो ।

जिल्ला तहका नेता–कार्यकर्ताहरूले निर्वाचनको आन्तरिक लेखाजोखा गरिरहेका छन् । उता नेकपा (एमाले) भित्र धमाधम उम्मेदवार टुंगो लगाउने काम भइरहेको छ । हुन त टिकट नपाएपछि पार्टी छाड्ने र असन्तुष्ट नेता–कार्यकताहरूको संख्या उत्तिकै छ । तर सत्ता गठबन्धनभित्र भने जताततै मनमुटाव मात्रै देखिन्छ ।

काँग्रेसले प्रायः जिल्लामा गठनबन्धन गर्न चाहेको छैन । कतिपय जिल्लामा गठबन्धन दलका सदस्यमाथि सम्मानजनक व्यवहार नगरेको माओवादी नेताहरू नै बताउँछन् । बराबर भागबण्डा खोज्दा साझा उम्मेदवार बनाउन सक्ने स्थितिमा देखिँदैनन् । उनीहरू एकआपसमा प्रतिस्पर्धा गर्न पनि तयार छैनन् । केन्द्रले लादेको निर्देशनमा उनीहरु चुपचाप देखिन्छन् ।

काँग्रेस, माओवादी, एकीकृत समाजवादी, जनमोर्चा र जनता समाजवादी पार्टीका शीर्ष नेताहरूले गठबन्धनको झमेला झेलिरहेका छन् । स्थानीय नेता–कार्यकर्ताहरू नै गठबन्धन गर्ने सन्दर्भमा एकमत छैनन् । उनीहरू एक अर्काप्रति नरम पनि देखिँदैनन् । आजसम्म पनि एउटाले अर्कालाई पाएसम्म आलोचना गरिरहेकै छन् ।

चुनावी गठबन्धन भए पनि आफ्ना कार्यकर्ताले माओवादीलाई मतदान गर्ने कुरामा केन्द्रीय नेताहरू नै शंका गर्छन् । ‘माओवादी कार्यकर्ताहरू इमान्दार छन् । उनीहरूले गठबन्धन हुँदा रूखमा भोट हाल्छन् । तर काँग्रेसका २५ प्रतिशत कार्यकर्ताले हँसिया–हथौडामा भोट हाल्दैनन्,’ काँग्रेस केन्द्रीय समितिका ती नेताले भने, ‘किनकि युद्धताका तीनै माओवादीबाट कैयौं कुटिएका छन् । कैयौं मारिएका छन् । ती व्यक्ति वा परिवारका सदस्यले कसरी माओवादीलाई भोट हाल्छन् ?’

संघीय सरकारमा पार्टी–पार्टीबीच गठबन्धन भए पनि स्थानीयस्तरमा चुनावी गठबन्धन गर्नै नहुने नेपाली काँग्रेस गण्डकीका एक पदाधिकारीले बताए । ‘माओवादीसँग चुनावी तालमेल आवश्यक नै छैन । यो काँग्रेस कार्यकर्ताको भावनामा चोट लाग्ने कुरा हो । गठबन्धनबारे देउवा–पौडेल नै जानून्, तर भोट कहाँ हाल्ने काँग्रेसीहरूलाई राम्रोसित जानकारी छ,’ उनले भने ।

युद्धकालमा माओवादीबाट कुटिएका, पिटिएका कार्यकर्ताहरूले केन्द्रीय नेताहरूको स्वार्थमा हँसिया–हथौडामा मतदान नगर्ने काँग्रेसकै एक जना प्रदेश सभापति दाबी गर्छन् । ‘देशलाई द्वन्द्वमा धकेलेर १० वर्षसम्म मुलुकमा अराजकता निम्त्याएको काँग्रेस कार्यकर्ताहरूले बिर्सिएका छैनन् । त्यो बेला मुङ्ग्रोले हानेर भाँचेको काँग्रेसी हातले कसरी हसिया हथौडामा हात हाल्ने ? ,’ उनले विगतको तीतो पोख्दै भने ।