शीतल निवासमा श्रीयन्त्रको चर्चा

राष्ट्रपति विद्यादेवी भण्डारीले वास्तु विज्ञ तथा राष्ट्रिय झण्डाको वर्तमान स्वरूपका ‘डिजाइनर’ शंकरनाथ रिमालको ‘श्रीयन्त्र’ मा समेटिएका पक्षहरू पूर्वीय दर्शनका प्रत्यक्ष प्रमाण भएको बताउनुभएको छ । रिमालको लामो समयको अनुसन्धानपछि प्रकाशित उक्त कृति समाजका निम्ति महत्वपूर्ण दस्तावेज रहेको पनि उहाँले उल्लेख गर्नुभयो ।

‘श्रीयन्त्र’ दस्तावेज समर्पण समारोहमा राष्ट्रपति भण्डारीले हिन्दुहरूका आराध्यदेव पशुपतिनाथ, प्रसिद्ध तलेजु भवानीको मन्दिरजस्ता धार्मिक तथा सांस्कृतिक महत्वका सम्पदामा श्रीयन्त्रद्वारा विभूषित गर्ने परम्परा भएबाट योमुलुकको सांस्कृतिक प्रतीकको रूपमा बताउनुभएको हो ।

पुस्तकबारे टिप्पणी गर्दै एक हजार आठ स्वामी रमणानन्द गिरीले संसार सञ्चालन भएको शिव र शक्तिको समरस्यको प्रतीक श्रीयन्त्र सृष्टि, स्थिति र संहारको मूल स्वरूप भएको अर्थ लगाउनुभएको छ । ऋग्वेददेखि नै श्रीयन्त्रको उपासना हुने गरेको जानकारी दिँदै उहाँले भन्नुभयो, ‘लेखक रिमालले वर्षौँ लगाएर श्रीयन्त्रको ज्यामितीय अनुपात निकाल्नुभएको छ । यो निकै खुशीलाग्दो कुरो हो ।’

श्रीयन्त्रमा शिवका चार र शक्तिका पाँच त्रिकोण हुन्छ । शिव भनेको प्रकाश हो र शक्ति भनेको विमर्श हो । तिनीहरूबिच चन्द्र र चन्द्रिकाको जस्तै अभेद्य सम्बन्ध रहेको बताइन्छ । सृष्टिको त्यही रहस्यलाई प्रकट गर्ने उद्देश्यले श्रीयन्त्रको रचना गरिएको मान्यता छ ।