सुन्दरी बलात्कारको छानबिन ‘आँखामा छारो हाल्न’ मा सिमित हुने खतरा

आठ वर्षअघि राजधानीको पाँच तारे होटल एभरेष्टमा सेटिङमा भएको सुन्दरी बलात्कारको घटनाले उग्र रुप लिन थालेको छ । पुराना र आमा सुन्दरीहरु पनि पक्ष र विपक्षमा बाँडिएका छन् । कतिपय सेलिब्रेटीले पीडित युुवतीलाई न्याय दिनुपर्ने आवाज उठाएका छन् ।

तीन दिनदेखि राजधानीका सडक र सामाजिक सञ्जालमा एभरेष्ट होटलको कोठामा भएको बलात्कारमा संलग्न मनोज पाण्डे र मतियारलाई कारवाही गर्न उनीहरुले माग गरेका हुन् ।

हिजो साँझ अभियुक्त भनिएका पाण्डे राजधानीको स्वयम्भू क्षेत्रबाट समातिएका छन् । झण्डै एक दशकअघिको उक्त घटनाताका उनीहरुबीच छ महिनादेखि आठ महिनासम्म राम्रै सम्बध रहेको पनि प्रहरी स्रोतले बताएको छ ।

रिलेसनसिप भए पनि त्यस्तो हर्कत गर्नुले किशोरीको शरिरलाई खेलौनाको रुपमा लिएको प्रष्ट भएको छ । त्यसैको प्रतिक्रियास्वरुप अहिले समाजमा चर्चा र आक्रोश पैदा हुनु स्वाभाविक भएको पनि प्रहरी र समाजशास्त्रीहरुको भनाइ छ ।

बलात्कारको आरोप लागेका पाण्डे काँग्रेस आवद्ध हुन् । अर्घाखाँचीका पाण्डे मुछिएको उक्त घटनालाई केही काँग्रेसीहरु तत्काल सामसुम पार्न लागि परेको देखिन आएको हो । तर सडकमा चर्को आवाज उठिसकेकाले मत्थर पार्न प्रहरीको अपराध अनुसन्धान महाशाखाका एसएसपी वसन्त कुँवरको संयोजकत्वमा छानबिन कमिटी गठन गर्न प्रहरी बाध्य भएको बताइन्छ ।

उक्त कमिटीको बैठक हिजो प्रहरी हेडक्वार्टरमा बसेको थियो । तर, बैठकले खासै धेरै पक्षमा चर्चा नगरेको गृह मन्त्रालय स्रोतले बताएको छ । गृह मन्त्रालयले पनि दोषीलाई कारवाही गर्ने वचनसहित हिजै साँझ विज्ञप्ति निकालेको छ ।

मन्त्रालय स्रोतले आठ वर्षअघिको घटनामाहदम्याद लाग्ने भएकोले बलात्कारमा मुध्दा दर्ता हुन नसक्ने अनौपचारिक कुराकानीमा बताएको छ । बरु मनोजलाई तीन महिनासम्म प्रहरी हिरासतमा राखेर बयान लिने कार्य मात्र हुनसक्ने आकलन गरिएको हो । त्यसवीच विरोधको आवाज क्रमश: सेलाउँदै गएर मनोजले कुरा मिलाई अदालतबाट धरौटीमा छुट्नसक्ने आकलन गरिएको छ ।

अहिले माल्भिका सुब्बालगायतले सामाजिक सञ्जाल र मिडियाबाट जुन दबाब सिर्जना गराएका छन्, त्यसले प्रहरी प्रशासनलाई यस बिषयमा झट्ट केही बोलिहाल्न अप्ठेरो भएको हो । अधिकांश सुन्दरी र अभिनेत्रीहरुले सामाजिक सञ्जालमार्फत बिरोधको आवाज घन्काएकोले त्यसलाई मत्थर पार्न पनि कमिटी गठन गर्नुपरेको मन्त्रालयका अधिकारीहरु बताउँछन् । यी सबै परिदृश्यले, ‘केही गरेको देखाउनैका निम्ति अहिलेका विज्ञप्ति,प्रतिबद्धता र छानबिन कमिटी सतहमा आएको,’ एकाध विश्लेषकहरुको बुझाई छ ।