अछाममा १५ वर्षे बालकको शव फेला,प्रहरीमाथि गम्भीर आरोप

अछामको पञ्चदेव विनायकमा गत मंगलबार राति भएको घटनापछि बेपत्ता १५ वर्षे बालकको शव फेला परेको छ । डिएसपी रविराज थपलियाको कमाण्डमा खटिएको टोलीले महिला र बालबालिकामाथि पेलेपछि बेपत्ता भएका विनोद शाहीको शव आज फेला परेको हो ।

पञ्चदेवल विनायक नपा ४ मा डिएसपी थपलिया नेतृत्वको टोली अपरेशनमा गएलगत्तै बालक बेपत्ता भएका थिए । उनको शव आज बिहान १० बजे फेला परेको हो ।

स्थानीय कुच्चीका बासिन्दाले मध्यरात प्रहरीले दमन गरेको बताएका छन् । स्थानीयको घरभित्र छिरेर प्रहरीले गभर्वती महिलादेखि बालबालिकासम्मलाई कुटपिट गरेको भिडियो र फोटो भाइरल भइसकेको छ ।

नगर प्रशासनले डिएसपीसहितको टोली परिचालन गरी राति १२ बजे आफूहरूमाथि हातपात गरेको स्थानीयको गुनासो छ । गाउँमा केही युवाबीच सामान्य विवाद हुँदा नगर प्रशासनले प्रहरी लगाएर युवा, बालबालिका र महिलालाई कुट्न लगाएको उनीहरुको आरोप छ ।

गत स्थानीय तहको निर्वाचनदेखि नेपाली काँग्रेस र नेकपा एमालेका कार्यकर्ताहरुबीच झडपहरु भइरहेका थिए । निर्वाचनमा काँग्रेसले विपक्षी मतदाताको नाममा मत हाल्न खोजेपछि हेल्थ पोष्टमा रहेका दुईवटा बुथमा उनीहरुबीच कुटाकुट भएको थियो । उक्त झडपमा एमालेका केही कार्यकर्ता घाइतेसमेत भए । त्यही घटनाबाट काँग्रेस र एमालेबीच कालिकास्थानमा द्वन्द्व शुरु भएको बताइन्छ ।

काँग्रेस पक्षले एमालेलाई भोट दिएको भन्दै गाउँलेहरुलाई धम्काउने, गालीगलौज गर्ने र बाटो घाटोमा हिँडडुल गर्नसमेत रोग लगाउने जस्ता अमानवीय व्यवहार गर्दै आएको एमाले नगर कमिटी सदस्य बखतबहादुर शाहीले गुनासो गरेका थिए । वडाध्यक्षमा काँग्रेसका हर्कबहादुर बडुवालसँग ११७ भोटले पराजित शाहीले काँग्रेसले जिल्ला बाहिरका व्यक्तिलाई गाउँमा ल्याएर आफूहरुलाई तर्साउने काम गरेको बताउँदै आएका हुन् ।

काँग्रेसबाट निर्वाचित नगरप्रमुख अम्बिका चलाउनेले प्रहरी बोलाएर निर्दोष व्यक्तिलाई कुट्न लगाएको बताउँदै उनले भने, ‘चुनावको विषयमा हाम्रा साथीहरुको तर्फबाट गाउँमा सामान्य झगडा भएको हो । त्यस्तो अप्रिय घटना केही पनि भएको थिएन । तर, राति एकाएक घरमा प्रहरी आएर गर्भवती महिला, बालबालिका र युवाहरुमाथि अमानवीय ज्यादती गर्यो ।’

उनका अनुसार प्रहरीको कुटिपटबाट विनोद शाही,निराजन शाही,देवेन्द्र शाही,हिक्मत शाही,छत्र शाही, कमक शाही,जानकी शाही,हस्तना शाही,निलम शाही,गंगा शाहीलगायत घाइते भएका थिए । तर,विनोद हराइरहेका थिए । आज उनैको शव फेला परेको हो ।

प्रहरी प्रशासनमा काँग्रेसको दादागिरीविरुद्ध आफूले दिएका तीन वटा उजुरीको कुनै सुनुवाइ नगरी काँग्रेस र काँग्रेसबाट मेयर जितेकी अम्बिका चलाउने तथा पूर्व वडाध्यक्ष सज्जन शाहीसँगको मिलेमतोमा मध्यराति प्रहरीले आफूहरुमाथि ज्यादती गरेको नगर सचिव शाहीले गुनासो गर्दै आएका छन् ।

घटनामा संलग्न रहेको आरोपमा देवेन्द्र शाही र मंगल शाही पक्राउ परेको बताइएको थियो । अन्य छ जनाको खोजी कार्य भइरहेको डिएसपीले जानकारी दिएका थिए । फरार भनिएका कृष्ण शाही, निराजन शाही, हिम्मत शाही, कमल शाही,भर्द शाही,विनोद शाही र राजेन्द्र शाहीमध्ये विनोदको शव फेला परेको हो ।