न्यायाधीशहरुले गम्भीर मुद्दाको फैसलाअघि न्यायिक छिद्र खोजेको आरोप

ललितपुर जिल्ला अदालत बार एसोसिएसन महिला समितिले आयोजना गरेको कार्यक्रममा जबर्जस्ती करणीको कसुरको विषय उठाइएको छ । समितिले आयोजना गरेको ‘जबर्जस्ती करणीको कसुरमा न्याय चुहिने छिद्रहरू : चुनौती र निकास’ कार्यक्रमका प्रमुख अतिथि उच्च अदालत दिपायलका न्यायाधीश टेकनारायण कुँवर हुनुुहुन्छ ।

जबर्जस्ती करणी सम्बन्धी मुद्दाहरुमा वकालत गर्दै आउनु भएकी अधिवक्ता तथा समितिको अध्यक्ष थापाले पीडितहरुले वास्तविक न्याय पाउन नसकेकाले कानुनी छिद्रहरु टाल्नको निम्ति बहस हुन भएको जानकारी दिनुभएको छ । उहाँले हदम्यादको बारेमा घटनाको प्रकृतिलाई हेरेर सोहीअनुसारको कानुन हुनुपर्ने धारणा उठ्दै आएको प्रसंग कोट्याउनुभएको छ ।

कार्यक्रममा अधिवक्ता रेवतीराज त्रिपाठी र रोशनी पौडेलले प्रस्ततु कार्यपत्रमाथि टिप्पणी गर्ने तालिका राखिएको छ ।

‘अदालतले पीडितलाई न्याय दिलाउने सन्दर्भमा पूर्ण न्याय दिलाउन सक्यो कि सकेन , समाजमा पुनस्र्थापनाको हकमा न्यायालयले ध्यान दियो कि दिएन भन्ने कुरालाई आधार मानेर कार्यक्रम भएको,’ थापाले कार्यक्रम सुरु हुनै लाग्दा बताउनुभएको हो ।

‘न्यायमूर्तीहरुले त्यस्ता घटनासँग जोडिएका मुद्दाको फैसला गर्ने सन्दर्भमा यदाकदा न्यायमा छिद्र खोजिएको देखिएकाले,’ बाध्य भएर कार्यक्रम गरिएको उहाँको तर्क छ ।