प्रधानमन्त्री निवासको मुख्य प्रवेशद्वारमा ढल फुटेर बिजोग, सर्वसाधारणको मलमुत्र भीआईपी परिसरमा

प्रधानमन्त्रीको सरकारी निवास बालुुवाटारको मुख्य प्रवेशद्वारमा ढल फुटेर बिजोग भएको छ । निवासको १ नम्बर गेटको आडैमा फुटेको ढल उक्त ढोका भएर प्रधानमन्त्री निवासभित्र छिरेको हो ।

केही दिनदेखि निरन्तर परेको पानीका कारण ढल फुटेको बताइन्छ । अघिल्लो महिनादेखि प्रधानमन्त्री निवास अगाडिको सडक अवरुद्ध पारेर ढललाई प्रधानमन्त्रीको निवास हुँदै दक्षिणतर्फ लैजाने कार्यको थालनी भएको हो । यही बेला सबैको ढल मिसिएको ठूलो पाइप फुटेर प्रधानमन्त्रीको दैलौमै छरपष्ट भएको छ ।

पहिले किरियापुत्री बस्ने घर मासेर बनाइएको उक्त ढल अन्ततिर फर्काउन खोज्दा प्रधानन्यायाधीश निवास हुँदै लाजिम्पाट निस्किने सर्वसाधारण र सवारीसाधनवालाले महिना दिनदेखि दुःख पाइरहेका छन् ।

२०७२ सालको भूकम्पले हल्लाएपछि प्रधानमन्त्री निवासभित्रको मुख्य भवनलाई आधुनिक बनाइएको छ । अन्य संरचनासँगै मुख्य सचिवको आवास पनि त्यहीँभित्र बनाई त्यसलाई अघिल्लो सरकारका प्रधानमन्त्री केपी शर्मा ओलीको पालादेखि प्रधानमन्त्रीद्वारा कब्जा गरिएको छ ।

प्रधानमन्त्री निवासको सुविधासम्पन्न नवनिर्मित भवनको उद्घाटन र पहिलो प्रयोग गत हिउँददेखि प्रधानमन्त्री शेरबहादुर देउवाले गर्न थाल्नुभएको छ । दुई वर्षमा निर्माण सम्पन्न तीनतले भवनमा आधुनिक सबै सुविधा उपलब्ध रहेको बताइन्छ । तर, अहिले त्यहि भवनको अघिल्तिरबाट खोलो झैं ढल बगेको छ ।

२२ कोठाको प्रधानमन्त्री निवासमा जिम हल, योगा हल र पूजा कोठासमेत छन् । ३३ करोड ८० लाख नेपाली रूपैयाँमा बनाइएका भवनमा ज्योतिषले वास्तु नमिलेको भनेपछि अघिल्लो महिनादेखि प्रधानन्यायाधीशको निवासभन्दा पछाडिको सडक बन्द गरेर ढलको नयाँ पाइप बिच्छाइएको छ ।

अहिले ढल फुटेको स्थान प्रधानमन्त्री निवासको १ नम्बर गेट भएको ठाउँमा पहिले सानो खोल्सा बग्थ्यो । क्वार्टर बन्नुअघि उक्त खोल्सोको मुहान शिवपुरी स्कुलदेखि दक्षिणको पाखोसम्म थियो । पछिसम्म पनि बर्खामा तर्न नसक्ने पानी बग्ने उक्त खोल्सोलाई पुरेर प्रधानमन्त्री निवास बनाइएको स्थानीयहरु बताउँछन् ।

‘अहिले १ नम्बर गेट भएको ठाउँमा पहिले किरियापुत्री बस्ने भवन थियो । यो एरियाका मानिसलाई किरिया बस्ने पाटी नै बनाइएको थियो । तर पछि ती सबै मासिए, ’ स्थानीयले भने, ‘अहिले त्यही खोल्सो मासेर बनाइएको ढलमा सर्वसाधारणको मलमुत्र बग्छ ।’

त्यही मलमूत्रलाई प्रधानमन्त्री निवास अघिल्तिरको आँगनबाटै ढल हालेर दक्षिणतर्फ पर्खाल बाहिर लैजाने योजना बनाइयो । बर्खामा आउने ठूलो भेल पनि त्यही ढल भएर बग्नुपर्ने भएकाले अहिले ढल फुटेर बिजोग भएको हो ।

उक्त ढललाई कम्पाउण्डबाट बाहिर लैजान ज्योतिषले सल्लाह दिएपछि प्रधानमन्त्री निवासको ढललाई समेत १ नम्बर गेटबाट बाहिर निकालिएको हो । ढललाई प्रधानन्यायाधीशको क्वार्टर हुँदै दक्षिणमा खोलिएको नयाँ बाटोबाट मुख्य सचिवको निम्ति बनाइएको भवन नजिकै पुर्याउन खोजिएको छ ।

उक्त कार्यमा एक करोड रुपैयाँभन्दा बढी खर्च गरिएको छ । तर, आफ्नो मात्रै होइन सर्वसाधारणको समेत ढल छिरेपछि बालुवाटारमा तनाव थपिएको हो ।