केपी ओली पूर्वमा बोलेपछि सभामुखको गृहजिल्लाबाट आयो अर्कै खबर

एमाले अध्यक्ष केपी शर्मा ओलीले वाम सहकार्यको सम्भावना नरहेको प्रतिक्रिया दिएलगत्तै सिन्धुपाल्चोकमा एमाले र माओवादीबीच जिल्ला समन्वय समिति गठनमा मिलेर जाने सहमति भएको छ । दुई पार्टीले बकाइदा सहमति पत्रमा हस्ताक्षर गरेर जिससको चुनावमा साझा उम्मेद्वारी दिने निर्णय गरेका हुन् ।

नेपाली काँग्रेसले एकीकृत समाजवादीसँग गठबन्धन गरेपछि भड्किएको माओवादी र सत्ता गठबन्धनका कारण स्थानीय चुनावमा अकल्पनीय क्षेती व्यहोरेको एमाले अन्तत: एक ठाउँमा आइपुगेका हुन् । कांग्रेसले भने समाजवादीलाई उपप्रमुख र एक सदस्य दिएर बाँकी पद एक्लै लिने गरि सहमति गरेको छ ।

सिन्धुपाल्चोकमा जिससको चुनाव आइतबार हुँदैछ । १२ स्थानीय तह रहेको जिल्लामा जिससको २४ मतमध्ये कांग्रेस १२, एमाले सात, माओवादी केन्द्र चार र एकीकृत समाजवादीको एक भोट छ । जिसस निर्वाचनका लागि स्थानीय तहका प्रमुख र उपप्रमुख मतदाता हुन् । बहुमत पुर्याएर जिसस गठन गर्न १३ मत आवश्यक हुन्छ ।

तर, कुनै पनि दलसँग एक्लै बहुमत पुग्ने मत छैन । त्यसैले गठबन्धन गर्नैपर्ने बाध्यता भएकाले स्थानीय चुनाव मिलेर लडेका गरेका कांग्रेस र माओवादीबीच तालमेल हुने अनुमान धेरैको थियो ।

तर, त्यसविपरित माओवादी र एमाले मिलेका हुन् । दुई पार्टीले जिसस गठनमा मात्र नभई वामपन्थी मतको रक्षा र दीर्घकालीन महत्वलाई समेत ध्यानमा राखेर यो गठबन्धन बनाएको दाबी गरेका छन् ।

माओवादीका सिन्धुपाल्चोकका अध्यक्ष गोविन्द प्रसाद पराजुली र एमाले अध्यक्ष कमल प्रसाद नेपालद्वारा जारी विज्ञप्तिमा मुलुकमा वामपन्थी एकताको माग बढ्दै गएको सन्दर्भमा जिससको चुनावमा मिलेर जानु उपयुक्त हुने उल्लेख छ ।

रमाइलो कुरा चैं, सिन्धुपाल्चोक सभामुख अग्नि सापकोटाको गृहजिल्ला हो । एमालेले संसदमा गरेको एक वर्ष लामो अवरोध सापकोटा केन्द्रित थियो । जसका कारण केन्द्रीय राजनीतिमा दुई पार्टी तथा सभामुख र एमालेबीच तिक्ततापूर्ण सम्बन्ध रहेका बेला जिल्लाका नेताहरुले भने सहकार्यको हात अघि बढाएका हुन् ।