चीनको सुझाव लत्याएर नयाँ दिल्लीमा १२ बुँदे सम्झौता भएको दावी

चीनका तत्कालीन राष्ट्रपति हु चिनथाओले डेढ दशकअघि नेपालमा राजनीतिक संकट गहिरिँदै गएपछि आफ्ना प्रतिनिधि पठाउनुएको थियो । उहाँले स्टेट काउन्सिलर थाङ जिया सुआनलाई सन् २००६ मा काठमाडौैं पठाउनुभएको हो ।

चीन अध्ययन केन्द्रका तत्कालीन अध्यक्ष मदन रेग्मीका अनुसार थाङले काठमाडौं बसाईको क्रममा राजा ज्ञानेन्द्र शाह र राजनीतिक दलका नेताहरुबीच समन्वयको प्रयास गर्नुभएको थियो । सोही क्रममा केन्द्रले समेत थाङको सम्मानमा दिवा भोजको आयोजना गरेको थियो । उक्त भोज चिनियाँ दूतावासको सहयोगमा आयोजना गरिएको रेग्मीले सामाजिक सञ्जालमा उल्लेख गर्नुभएको छ ।भोजमा विभिन्न दलका नेता,नेपाल सरकारका उपप्रधानमन्त्री,मन्त्री, बुध्दिजीवी,सञ्चारकर्मी,उच्चपदस्थ सरकारी कर्मचारी र काठमाडौंस्थित विभिन्न देशका कूटनीतिज्ञहरुको उपस्थिति थियो । रेग्मीका अनुसार चिनियाँ विशिष्ट पाहुना नेपाल आउनुअघि नै बेइजिङले नेपालको राजनीतिमा देखिएको मतभेद अन्त्य गर्न भन्दै राजनीतिक स्थिरता र प्रगतिलाई प्राथमिकतामा राखेर दुई वटा विकल्प अघि सारेको थियो ।

तर ती विकल्पहरु कस्ता थिए भन्नेबारे केही बताइएको छैन । चिनियाँ राष्ट्रपतिका दूत तथा स्टेट काउन्सिलर थाङको सम्मानमा राजा ज्ञानेन्द्रले दिनुभएको रात्रि भोजमा पनि चिनियाँ पाहुनाले शाहलाई मिलेर अघि बढ्न सल्लाह दिनुभएको रेग्मीको दाबी छ । तर, राजाले चीनको सुझावलाई एउटा कानले सुनेर अर्को कानले उडाइदिनुभएको रहेछ ।

राजाले चीनको सुझावलाई मनन् गर्नुभएको भए सम्भवतः नयाँ दिल्लीमा माओवादी र संसदवादी दलहरुबीच १२ बुँदे सम्झौता नै नहुने ठोकुवा उहाँको छ ।