एमाले अध्यक्ष नेकपा एकीकृत समाजवादीको कार्यालय नजिकै

नेकपा एमालेका अध्यक्ष केपी शर्मा ओली हिजो साँझ माधवकुमार नेपाल नेतृत्वको नेकपा एकीकृत समाजवादीको कार्यालय सामुन्ने पुग्नुभयो । अध्यक्ष नेपाल र एकीकृत समाजवादीको नाम पनि सुन्न नचाहने अध्यक्ष ओली हिजो साँझ साढे ६ बजेको समयमा मीनभवन नजिकैको आलोकनगर पुग्नुभएको हो ।

उहाँ आलोकनगर छेउको बागमती करिडोरस्थित मदन भण्डारी बाटिका अवलोकन गर्न जानुभएको बताइएको छ । उहाँ पूर्व कानुनमन्त्री अग्निप्रसाद खरेल,कामनपाकी उपमेयर सुनिता डंगोललगायत डेढ दर्जनसँगै उक्त बाटिका छिर्नुभएको हो ।

एकीकृत समाजवादीको कार्यालय सामुन्ने रहेको उक्त बाटिका खरेलको घर छेउमा रहेको छ । खरेल पत्नीलगायतको सक्रियतामा बागमती करिडोरमा उक्त बाटिका निर्माण गरिएकाले एक पन्थ, दुई काज भनेझैँ अध्यक्ष ओली हिजो एकीकृत समाजवादीको कार्यालय नजिकै जानुभएको हो ।

यसअघि उहाँ गत बिहीबार धुलिखेल नगरपालिका क्षेत्रको अवलोकन भ्रमणको निम्ति जानुभएको थियो । त्यसबेला नगरका मेयर अशोक ब्याञ्जुलगायतले अध्यक्ष र उहाँकी श्रीमतीको स्वागत गर्नुभएको थियो ।