निलम्बित गाउँपालिका अध्यक्षलाई निर्वाचनमा संलग्न नगराउन माग

सार्वजनिक सम्पत्ति हानी नोक्सानी गरेको आरोपमा निलम्बित कैलालीको मोहन्याल गाउँपालिकाका नवनिर्वाचित अध्यक्ष देवीदत्त उपाध्यायलाई जिल्ला समन्वय समितिको ( जिसस) निर्वाचनमा सहभागी नगराउन माग गरिएको छ ।

अख्तियार दुरुपयोग अनुसन्धान आयोगमा परेको उजुरीपछि भ्रष्टाचार पुष्टि भई फरार रहेकाले उनलाई जिससको निर्वाचनमा सहभागी नगराउन माग गरिएको हो ।

समितिको उपप्रमुख पदका उम्मेदवार राजेन्द्रप्रसाद खनालले मुख्य निर्वाचन अधिकृतको कार्यालयमा निवेदन दिँदै विशेष अदालतबाट फरार सूचीमा रहेका अध्यक्षलाई मतदान प्रक्रियामा सहभागी नगराउन आग्रह गरेका हुन् ।

अध्यक्ष उपाध्यायको नाम मतदाता नामावलीमा प्रकाशित भएकोतर्फ उल्लेख गर्दै उनले भनेका छन्, ‘मतदान प्रक्रियामा सहभागी नगराइयोस् ।’ खनालले माग गरेको निवेदन मुख्य निर्वाचनको कार्यालयमा अस्ति पेश भइसकेको छ ।