मुस्ताङमा जहाज खस्नुको मुख्य कारण ‘खराव मौसम’

गत जेठ १५ गते बिहान भएको तारा एअरको विमान दुर्घटनाको छानबिन अन्तिम चरणमा पुगेको छ । सो दिन बिहान पोखराबाट मुस्ताङको जोमसोम उडेको तारा एअरको ९ एनएइटी ट्वीनअटर विमान मानापाथी हिमालको फेदीमा अवस्थित थासाङ गाउँपालिकाको सानुसरेमा भोलिपल्ट बिहान दुर्घटनाग्रस्त अवस्थामा भेटिएको थियो । सानुसरे कोबाङबाट नजिकैको दूरीमा पर्छ ।

सोही दुर्घटनाको छानबिन र अनुसन्धान गर्न सरकारले गठन गरेको आयोगले प्रतिवेदनको प्रारम्भिक मस्यौदालाई अन्तिम रुप दिन लागेको हो । उक्त दुर्घटना मूलतः मौसमको कारणले भएकोमा टोली सदस्यहरु नजिक पुगेको बताइन्छ । तारा एअरको जहाज दुर्घटना हुनुभन्दा ५ मीनेटअघि अर्को कम्पनीको विमान सोही रुटबाट जोमसोम गएको थियो । सोही विमानले पनि बिहान पोखरा–जोमसोम–पोखराको उडान गरेको थियो ।सोही मार्ग भएर केही मीनेटको फरकमा अन्य जहाज उडेको अवस्थामा ताराको विमान दुर्घटना हुनुलाई मौसम मुख्य कारण भएको आयोगलाई उद्धृत गर्दै संस्कृति, पर्यटन तथा नागरिक उड्डयन मन्त्रालय स्रोतले दाबी गरेको छ । स्रोत भन्छ, ‘जहाज र अन्य प्राविधिक अवस्था सबै ठीक रहेको पाइएको छ । पाइलटको खासै कमजोरी देखिएको छैन ।’

अब प्रतिवेदन जतिसक्दो छिटो बुझाउने तयारीमा रहेको बुझिएको छ । उक्त प्रतिवेदन दुर्घटनामा मारिएका विदेशी यात्रुको मुलुकमा पनि पठाउनुपर्ने आइकाओको नियम छ । तारा एअर दुर्घटनामा दुई जना जर्मन र चार जना भारतीय नागरिक मारिएका थिए । १३ जना नेपाली र चार जना चालक दलका सदस्यको पनि उक्त दुर्घटनामा ज्यान गएको हो ।

दुर्घटना जाँच आयोगमा वरिष्ठ एरोनटिकल इञ्जिनियर रतिशचन्द्र लाल सुमनको अध्यक्षतामा क्याप्टेन दिपुराज ज्वार्चन र वरिष्ठ मेन्टिनेन्स इञ्जिनियर उपेन्द्रलाल श्रेष्ठ सदस्य छन् । त्यसैगरी वरिष्ठ मौसमविद् मणिरत्न शाक्य र मन्त्रालयका सहसचिव प्राविधिक बुद्धिसागर लामिछानेलाई पनि सदस्यमा राखिएको छ ।