व्यक्ति हत्याको बात लागेका मेयर अन्ततः समातिए

अछामको पञ्चदेवल विनायक नगरपालिका–४, कालिकास्थान कुच्चीका विनोद शाहीको हत्या गरेको आरोपमा थप दुई जना पक्राउ परेका छन् । घटना भएको करिब एक महिनापछि हत्याको अभियोगमा नगर प्रमुख अम्बिका चलाउने र नेत्र शाहीलाई हिजो प्रहरीले पक्राउ गरेको हो ।

प्रहरीले पाँच जनालाई यसअघि नै नियन्त्रणमा लिएर अनुसन्धान गरिरहेको छ । तर, किटानी जाहेरी परेपनि मेयर चलाउने पक्राउ परेका थिएनन् । राजनीतिक प्रभावका आधारमा उनलाई जोगाउन खोजेको भन्दै पीडित पक्ष आन्दोलनमा छ ।

अछामका प्रहरी प्रमुख नारायण डाँगीका अनुसार मेयर चलाउनेविरुद्ध किटानी जाहेरी परेकाले पक्राउ गरिएको हो । मृतकका दाइ डम्बर शाहीले काँग्रेसबाट निर्वाचित नगरप्रमुख चलाउने, जिल्ला समन्वय समिति उपप्रमुख दानमती शाही र पूर्ववडाध्यक्ष सज्जन शाहीसहित १३ जनाविरुद्ध किटानी जाहेरी दिएका थिए । त्यसमध्ये सात जनालाई प्रहरीले पक्राउ गरेको हो । अन्य छ जना भने फरार छन् ।

गत जेठ २१ गते घर नजिकैको भिरमा मृत भेटिएका शाहीको हत्या भएको भन्दै उनका परिवार र आफन्तले सत्यतथ्य छानविनको माग गर्दै आएका छन् । किटानी जाहेरी परेका व्यक्ति पक्राउ नपर्दा हत्याजस्तो जघन्य अपराधको घटना सामसुम पार्न खोजेको आशंकामा स्थानीय राजनीतिक दलसहित पीडित पक्ष आन्दोलनमा उत्रिएको छ ।

नेकपा एमाले, माओवादी केन्द्र, एकीकृत समाजवादी, राप्रपा र विप्लव नेतृत्वको नेकपाले अछाममा आज र भोलि चक्काजाम घोषणा गरेका हुन् ।