आफूले प्रयोग गर्ने गाडी बेचेर रोलर किन्ने मेयर साम्पाङको घोषणा

धरान उपमहानगरपालिकाका मेयर हर्क साम्पाङले आफ्नो लागि किनिएको गाडी बेचेर बाटो बनाउने काममा प्रयोग हुने रोलर किन्ने बताएका छन् ।

हर्कले सामाजिक सञ्जालमार्फत् सडकका खाल्डाखुल्डी पुर्न र साना पिचमा प्रयोग हुने रोलर किन्ने घोषणा गरेका हुन् । ‘मेयरलाई भनेर किनिएको स्कार्पियो गाडी बेचेर धरानको बाटोभरिका खाल्डा टाल्न यो रोलर मेसिन किन्ने विचार छ मेरो ।
आज कार्यपालिकाले ताली बजाएर अनुमोदनसमेत गरिदिएको छ । जय धरान,’ उनले फेसबुकमा लेखेको स्ट्याटस यही हो ।

उनको उक्त प्रस्तावलाई हिजो बसेको कार्यपालिका बैठकले स्वागतयोग्य काम भन्दै ताली बजाएर अनुमोदन गरेको छ ।

साम्पाङले गत वैशाख ३० गते सम्पन्न स्थानीय तहको निर्वाचनमा स्वतन्त्र उम्मेदवारीबाट चुनाव जितेका हुन् ।