चिनियाँ नेतासँग परराष्ट्रमन्त्रीको रात्रिभोज काङ्ग्रेस पूर्व महामन्त्रीद्वारा बहिष्कार

हिजो साँझ काठमाडौंको नागपोखरीस्थित होटल मेरियटमा चिनियाँ कम्युनिष्ट पार्टी विदेश विभाग प्रमुख लिउ जियान्चाओको सम्मानमा रात्रिभोजको आयोजना गरिएको थियो । परराष्ट्रमन्त्री डा. नारायण खड्काले आयोजना गर्नुभएको ककटेल डिनरमा थुप्रै काँग्रेसी नेताको सहभागिता थियो ।

तर,रात्रिभोजमा उपस्थित भए पनि नेता तथा निवर्तमान महामन्त्री डा. सशांक कोइराला भने पार्टी हलबाट बाहिर निस्केर होटलको तल्लो भागमा अवस्थित रेष्टुरेन्टमा बसी कफी पिएर हिंडेकोमा मन्त्री नारायण खड्काले चित्त दुखाउनुभएको छ । चिनियाँ पाहुनाको छ सदस्यीय टोलीसँगै अरु काँग्रेसी नेताले हातमा मदिराको गिलास समाएर भलाकुसारी गरिरहँदा सशांक एकाएक तल ओर्लेको बताइन्छ । कफी पिउने नेतासँग अरु कोही पनि थिएनन् ।

साँझदेखि शुरु भएको उक्त भोज अबेरसम्म जारी थियो । भोजमा परराष्ट्रमन्त्री डा. नारायण खड्कासहित नेपाली काँग्रेसका वरिष्ठ नेता रामचन्द्र पौडेल, उपसभापति धनराज गुरुङ्गको उपस्थिति थियो ।

त्यसैगरी नेताहरु डा. शेखर कोइराला,प्रकाशमान सिंह,सुजाता कोइराला,डा.प्रकाशशरण महत, पुष्पा भुसाल,डा. महालक्ष्मी डिना उपाध्याय,खानेपानीमन्त्री उमाकान्त चौधरी,परराष्ट्र मन्त्रालयका पूर्वकर्मचारी दिनेश भट्टराई लगायत दुई दर्जन सहभागी हुनुहुन्थ्यो ।