लोकप्रिय मतमा पनि काँग्रेस नै पहिलो

स्थानीय तहको पछिल्लो निर्वाचनमा ३२९ पालिकाको नेतृत्व जितेर पहिलो पार्टी बनेको नेपाली काँग्रेस लोकप्रिय मतमा पनि सबैभन्दा अगाडि रहेको औपचारिक रिपोर्ट सार्वजनिक भएको छ । निर्वाचन आयोगले आज सार्वजनिक गरेको अन्तिम मतपरिणाममा काँग्रेसले वडाध्यक्षतर्फ एमालेले भन्दा झन्डै डेढ लाख मत बढी पाएको उल्लेख छ ।

२६ सय ६८ वडाअध्यक्ष जितेको काँग्रेसले ३९ लाख ५६ हजार एक सय ९३ मत पाएको छ । काँग्रेसले पाएको यो मत ३४.२८ प्रतिशत हो ।

वडाध्यक्षतर्फ पहिलो भएको दाबी गरिरहेको एमालेले काँग्रेसलेभन्दा १ लाख ४४ हजार ५९१ मत कम ल्याएको छ । जम्मा २१ सय ३७ वडाध्यक्ष जितेको एमालेले ३८ लाख ११ हजार ६०२ मत ल्याएर दोस्रो भएको हो । यो कूल मतको ३३.०३ प्रतिशत हो ।

त्यस्तै, १५ लाख ३ हजार २४७ भोट पाएको माओवादी तेस्रो र पाँच लाख ७७ हजार ३८० मतसहित जनता समाजवादी पार्टी (जसपा) चौथो भएको छ । यी दुवै दलले वडाध्यक्षतर्फ पाएको मतको प्रतिशत क्रमशः १३.३ र ५ प्रतिशत हो ।

एकीकृत समाजवादीले चार लाख २२ हजार ७३७ भोट पाएको छ । जसअनुसार ३.६६ प्रतिशत भोट ल्याएको हो । राष्ट्रिय प्रजातन्त्र पार्टीले तीन लाख ६४ हजार १६० र लोसपाले दुई लाख ४४ हजार ८८२ भोट पाएका छन् ।