आमरण अनसनकारीले ठाउँ सरेपछि मुख खोले

१० दिनदेखि आमरण अनसन बस्दै आएका गंगालाल श्रेष्ठले आफ्नो रिक्सा अभियानलाई सफल हुन नदिन षड्यन्त्र रचिएको आरोप लगाएका छन् । उनले यस्ता गलत कार्य तत्काल रोक्न सरकारसँग माग पनि गरेका छन् ।

अपराधीलाई संरक्षण गर्ने,निर्दोष र निमुखा जनतालाई झुटो अभियोग लगाई फसाउने खेल बन्द हुनुपर्ने उनको नौ बुँदे मागमा उल्लेख छ ।

न्यायालय अपवित्र भएको,टुकुचाको ढलभन्दा पनि बढी गन्हाएको भन्दै न्यायालय सुधारको पनि उनले माग गरेका छन् । न्यायको खोल ओढेर अपराधिक कार्य गर्ने जोसुकैलाई तुरुन्त कारबाही गर्न सरकारसँग उनको माग छ ।

नेपाल नौलो जनवादी पार्टीको अध्यक्षसमेत रहेका श्रेष्ठले न्यायालयले पावर,मनी र सेटिङको प्रभावमा परेर न्याय सम्पादन गर्ने गरेको आरोप लगाएका छन् । न्यायालयलाई अपवित्र पार्न मद्दत पुर्याएको नेपालको संविधान २०७२ को धारा ५५ तुरुन्त संशोधन गर्नुपर्नेलगायत माग राखेर उनले आमरण अनसन थालेका हुन् ।

श्रेष्ठले शान्ति स्थापनाको निम्ति आफ्नै नगरपालिकास्थित चण्डेश्वरी माविमा गत फागुन २८ गते जोडी परेवा उडाएर रिक्सा चढी देश भ्रमणको अभियान थालेका थिए ।

काभ्रेपलान्चोक मण्डन देउपुर नगरपालिका– १० का श्रेष्ठ आमरण अनसन बसेको आज १० औँ दिन हो । हिजो बिहानसम्म कोटेश्वरको महादेवस्थानमा बसेका उनी दिउँसोबाट माइतीघरमा सरेका छन् ।