मदन भण्डारीका नाममा राजधानीमा अन्तर्राष्ट्रिय जमघट

नेकपा एकीकृत समाजवादीले तत्कालीन एमाले महासचिव मदन भण्डारीको नाममा विश्वभरका कम्युनिष्ट प्रतिनिधिलाई भेला गराएर समाजवादबारे थप जानकारी गराउने भएको छ । आजदेखि यस कार्यक्रममा १६ वटा मुलुकबाट वामपन्थी दलका प्रतिनिधिहरुले भाग लिन लागेका छन् ।

मदन भण्डारी स्कूल अफ एशियाको संयोजनमा एकीकृत समाजवादीनिकट नेताहरुले कार्यक्रमको आयोजना गर्न लागेका हुन् । ग्लोबल स्कूलको रुपमा परिचित उक्त कार्यक्रममा भाग लिन काठमाडौैंमा १६ वटा मुलुकका वामपन्थी प्रतिनिधिहरु आइसकेका छन् ।

पार्टीका सम्मानित नेता झलनाथ खनालले उद्घाटन गर्ने उक्त अध्ययन कार्यक्रम २१ दिनसम्म चल्नेछ । उद्घाटनपछि बन्द कक्षामा मार्क्सवाद र लेनिनवादका विविध आयाम,पछिल्लो अनुभवको बारेमा जानकारी गराइने बताइएको छ ।

एकीकृत समाजवादीका अनुसार ब्राजिल,अर्जेन्टिना,घाना,मलेसिया र थाइल्याण्डका प्रतिनिधि सहभागी हुँदैछन् । त्यसैगरी दक्षिण एशियाका भारतलगायत सबै राष्ट्रमा रहेका कम्युनिष्ट पार्टीले पनि प्रतिनिधि पठाएका छन् ।

छिमेकी मित्रराष्ट्र चीनको कम्युनिष्ट पार्टीका प्रतिनिधिले भने भर्चुअल रुपमा भाग लिने बताइएको छ । २१ दिनसम्म ती सबै प्रतिनिधिलाई भक्तपुरको खरिपाटीस्थित विद्युत प्राधिकरणको तालिम केन्द्रमा खाने र बस्ने व्यवस्था मिलाइएको छ ।

कूल ६० जनामध्ये विदशी ४० जना र नेपालका २० जनाले भाग लिँदैछन् । कार्यक्रम खर्चमध्ये आतेजाते सहभागीको तर्फबाट र यहाँ रहुञ्जेलको अवधिभर खाने र बस्ने सुविधा एकीकृत समाजवादीले जुटाएको हो ।