बिहानै चीन पुग्यो डाक्टर मन्त्रीको टोली

छिमेकी मित्रराष्ट्र चीनको औपचारिक भ्रमणमा निस्केको परराष्ट्रमन्त्री डा.नारायण खड्का नेतृत्वको टोली आज बिहान चीनको पूर्वी भागस्थित सान्तोङ प्रान्तको छिङताओ शहर पुगेको छ । हिजो राति सवा ११ बजे चार्टर उडानबाट त्यता गएको टोली स्थानीय समयानुुसार आज बिहान झिसमिसेमै त्यहाँ पुगेको हो ।

हिमालय एयरलाइन्सको चार्टर विमानको उडान नम्बर एच 9-७२२० बाट मन्त्रीसँगै परराष्ट्र सचिव भरतराज पौडेललगायतको १० सदस्यीय टोली गए राति त्यसतर्फ उडेको हो ।

हिजो चीन गएका १० जना सबै सरकारी अधिकारी र कर्मचारी हुन् । टोलीमा परराष्ट्र मन्त्री र सचिवबाहेक भौतिक योजना,उध्योग वाणिज्य,अर्थ,गृहका सहसचिवसहित ईश्वरीप्रसाद अर्याल,तुल्सीप्रसाद कोइराला,बलिरामप्रसाद धामी,भुवन पौडेल, फणिन्द्रमणि पोखरेल, शिवानी बस्नेत, गणेशप्रसाद पाण्डे र गोपालप्रसाद सिग्देल सम्मिलित छन् । चाइना डेस्क हेर्ने सहसचिव लोकबहादुर थापा भने कोभिड संक्रमणका कारण अन्तिममा गएनन् ।