मेयरले आफ्नो एसईई दिन ज्वाईंलाई पठाए, पुलिसले छानबिन गर्दै

रौतहटको देवाही गोनाही नगरपालिकाका मेयरको नामबाट एसईई दिइरहेका नक्कली परीक्षार्थी पक्राउ परेका छन् । 

मेयर प्रेमलाल साह कानुको सट्टामा जाँच दिँदै गरेका गरुडा–६, पोठियाहीका कमल साहलाई प्रहरीले परीक्षा केन्द्रबाट नियन्त्रणमा लिएको हो । पक्राउ परेका उनी मेयर कानुका ज्वाईँ रहेको बताइएको छ । 

मौलापुर नगरपालिकाको लक्ष्मीनियाँ माविमा सञ्चालन भइरहेको परीक्षा अनुगमन गर्न गएको टोलीले आज बिहान साढे ९ बजे उनलाई पक्राउ गरेको हो । टोलीलाई शंका लागेर चेकजाँच गर्दा साह नक्कली परीक्षार्थी ठहरिएका थिए । 

मधेश प्रदेश, प्रहरी कार्यालयका प्रवक्ता एवम् सूचना अधिकारी महेन्द्रकुमार श्रेष्ठका अनुसार यस विषयमा थप अनुसन्धान भइरहेको छ । अनुगमन टोलीले नक्कली परीक्षार्थी साहलाई पक्राउ गरेपनि उनी मेयर प्रेमलाल साह कानुका तर्फबाट परीक्षामा सहभागी भएका हुन् वा होइन भन्ने विषयमा थप अनुसन्धान भइरहेको प्रवक्ता श्रेष्ठले बताए ।