एसईई परीक्षा केन्द्रबाट दुई सय जना परीक्षार्थी पक्राउ

माध्यमिक शिक्षा परीक्षा (एसईई) दिँदै गर्दा मोरङको तीनवटा परीक्षा केन्द्रबाट १९९ जना नक्कली परीक्षार्थी पक्राउ परेका छन् । सामाजिक अध्ययन विषयको परीक्षा दिँदै गर्दा आज बिहान जिल्लाको तीन वटा परीक्षा केन्द्रबाट ती परीक्षार्थी पक्राउ परेका हुन् ।

ग्रामथान गाउँपालिका वडा नम्बर २ स्थित सरस्वती माध्यमिक विद्यालय, केराबारी गाउँपालिका वडा नम्बर ७ स्थित सार्वजनिक माध्यमिक विद्यालय र सुन्दरहरैंचा नगरपालिका वडा नम्बर १ स्थित जनता माध्यमिक विद्यालयबाट १९९ जना परीक्षार्थीलाई नियन्त्रणमा लिएको प्रहरीले जनाएको छ ।

नक्कली परीक्षार्थीको आशंकामा उनीहरुलाई आज बिहान ९ बजे नियन्त्रणमा लिइएको जिल्ला प्रहरी कार्यालय मोरङका प्रहरी नायव उपरीक्षक एवम् प्रवक्ता रञ्जन दाहालले जानकारी दिए । 
उनले भने, ‘बिहान ९ बजे १९९ जना शकांस्पद परीक्षार्थीलाई नियन्त्रणमा लिएका छौं । हाल अनुसन्धान भइरहेको छ । कुन–कुन विद्यालयका विद्यार्थी हुन् भन्ने खुल्ने क्रममा छ ।’