काडमाडौं महानगरपालिकाले पछिल्लो समय मापदण्ड विपरितका संरचना भत्काउने नाममा व्यहोर्नुपरेको आलोचनालाई ललितपुर महानगरपालिकाले शिक्षाको रुपमा लिएको छ । आफ्नो क्षेत्रमा निर्मित अवैध संरचना भत्काउन ललितपुर महानगरपालिकाले सरोकारवाला र विज्ञहरुसँग आवश्यक छलफल गरेपछि कार्यविधिलाई अन्तिम रुप दिएको बताइएको छ ।
‘महानगर क्षेत्रमा बनाइएका अवैध संरचना भत्काउने वा नियमित गर्नेबारे कार्यविधि बनाइएको छ,’ चैत २७ गते बोलाइएको छलफलमा सहभागी एक जना सदस्यले भने । उनका अनुसार अब मापदण्ड विपरित बनाइएको तर सामान्य अवस्थाकालाई यथोचित राजस्व लिएर नियमित गर्ने सहमति भएको छ ।
तर, नियमित गर्न नसकिने अवस्थाकालार्ई भत्काउन सूचित गराइनेछ । सम्बन्धित घरधनीले भत्काए नगरपालिकाले खासै चासो नराख्ने बताइन्छ । नभत्काए महानगर आफैँले भत्काउने र त्यसमा लागेको खर्च सम्बन्धित घरधनीबाट असुल्ने निर्णय भएको छ ।
चैत २७ गते बसेर सरोकारसँग छलफल गरिएको मापदण्डलाई थप परिमार्जन गरेर अन्तिम रुप दिन लागिएको हो । कार्यविधिमा थप होमवर्क गर्नुपर्नेमा सबै सहमत भएको बताइन्छ । उनै सदस्यले भने, ‘काठमाडौंको हालत देखेर हामी सजग भएका छौं । अवैध संरचना भत्काउने र नियमित गर्ने सम्बन्धमा सर्प मर्ने, लठ्ठी पनि नभाँचिने उपायमा लागेका छौं ।’
