गत साता सार्वजनिक भएको झण्डै एक सय किलोग्राम सुन तस्करीमा मुछिएका राकेशकुमार अडुकियाको काठमाडौं–हङकङ कनेक्सन निकै घतलादो देखिएको छ । मोटरसाइकल र स्कुटरको ब्रेक सुभित्र राखेर यसपटक ल्याइएको सुन त पक्राउ पर्यो तर त्यसभन्दा पहिले कतिचोटेर ल्याइए सो को यकिन विवरण आइसकेको छैन । तर,यसरी कार्गो गरेर हङकङबाट सुन पटकपटक ल्याउने गरिएकोवारे भने अब कुनै शंका रहेन ।
पछिल्लो पटक फेला परेका ३२० थान ब्रेक सुभित्र राखिएको भनिएको सुनको परिमाण एक सय किलोग्राम छ । सुन हालिएको ब्रेक सुको आठ वटा बाकसलाई नेपाल राष्ट्र बैंकको टक्सार महाशाखास्थित ढुकुटीमा राखिएको छ ।
यी सबै सुनको मालिक हाललाई राकेश अडुकिया हुनसक्ने राजश्व अनुसन्धान विभागको प्रारम्भिक अनुमान छ । उनी नेपालमा जन्मेका भए पनि भारतीय नागरिकता र राहदानीवाहक हुन् । उनले जेड ६३९६४२१ नम्बरको भारतीय राहदानी बोकेर विदेश आउजाउ गरेको देखिन्छ ।
"ठ्याक्कै एक महिनामा हङकङ पुगे । जुन २६ तारिखका दिन नेपाल वायुसेवा निगमको उडान नम्बर आरए ०२१७ मा दिउँसो साढे १२ बजे नयाँ दिल्ली हुँदै फेरि हङकङ पुगे । १२ दिनको बसाईपछि जुलाई ५ तारिखका दिन हङकङबाट दुबई हुँदै फ्लाई दुबईको उडानमा मध्यरात काठमाडौं आइपुगे ।"
राकेशले पछिल्लो छ महिनामा हङकङ जान नयाँ दिल्ली,बैंकक र दुबई रुटसमेत प्रयोग गरेको पाइएको छ । जनआस्थाले प्राप्त गरेको पछिल्लो विवरणअनुसार उनी गत जनवरी १४ तारिखका दिन राति साढे १० बजे क्याथे प्यासिफिकको उडान नम्बर सीएक्स ०६४० बाट हङकङ गएका थिए । एक साता उता बसेर उनी जनवरी २१ तारिखका दिन क्याथे प्यासिफिककै उडान नम्बर सिएक्स ०६०३ मा राति साढे १० बजे काठमाडौं ओर्लिए ।
त्यस्तै अप्रिल १३ तारिखका दिन नेपाल वायुसेवा निगमको उडान नम्बर आरए २१७ बाट मध्यान्ह साढे १२ बजे नयाँ दिल्ली गएका थिए । त्यहाँबाट उतैउतै हङकङ पुगे र अप्रिल १९ तारिखका दिन बैंकक हुँदै थाई स्माइलको उडान नम्बर डब्लुई ०३१९ बाट दिउँसो पौने १ बजे काठमाडौं ओर्लिए ।
अडुकिया सुन तस्करीको सेटिङ मिलाउनैको निम्ति मे २६ तारिखका दिन क्याथे प्यासिफिकको उडान नम्बर सिएक्स ०६४० मा काठमाडौंबाट हङकङ उडेको बुझिएको छ । त्यसको पाँच दिनपछि उनी मे ३० तारिखका दिन राति सवा १० बजे सोही एअरलाइन्सको उडान नम्बर सिएक्स ०६०३ बाट काठमाडौं आएका थिए ।
त्यसपछि ठ्याक्कै एक महिनामा हङकङ पुगे । जुन २६ तारिखका दिन नेपाल वायुसेवा निगमको उडान नम्बर आरए ०२१७ मा दिउँसो साढे १२ बजे नयाँ दिल्ली हुँदै फेरि हङकङ पुगे । १२ दिनको बसाईपछि जुलाई ५ तारिखका दिन हङकङबाट दुबई हुँदै फ्लाई दुबईको उडानमा मध्यरात काठमाडौं आइपुगे । सुन उनले कहिले दुबई,कहिले हङकङबाट ल्याउने गरेको देखिन्छ ।
