रवि लामिछानेकाे बसमा महिला मात्रै चढ्न पाउने

राष्ट्रिय स्वतन्त्र पार्टीका सभापति रवि लामिछानेले आजदेखि आफ्नो निर्वाचन क्षेत्रमा महिलाले मात्रै प्रयोग गर्न पाउने निःशुल्क बस सेवा सञ्चालन गर्न लागेका छन् । उनले रास्वपाको झण्डामा प्रयोग भएको नीलो रंग पोतिएको बसलाई ‘ब्लु बस’ को नामाकरण गरेका छन् ।

लामिछानेले आफू उपनिर्वाचनमा निर्वाचित भएको एक सय दिन पुगेको अवसरमा निर्वाचन क्षेत्रका लागि विशेष कार्यक्रम सार्वजनिक गर्दै उक्त घोषणा गरेका हुन् । महिला मात्र सवार हुने उक्त बस चितवन क्षेत्र नम्बर २ को शहरी क्षेत्रमा सञ्चालनमा आउने बताइएको छ । 

बस चढ्न चाहनेले पहिले नै कार्ड लिनुपर्ने छ । बसभित्र महिलाका लागि अत्यावश्यक सामग्री राखिएको र सांसद लामिछानेसँग गुनासो भएमा चिठ्ठी खसाल्ने ठाउँको व्यवस्थासमेत गरिएको छ । लामिछानेले निर्वाचनको समयमा घोषणा गरेको एक सय जनालाई स्वदेशमा रोजगारीको घोषणा गरेका छन् । उनीहरुलाई मासिक ४० हजारदेखि एक लाख ५० हजारसम्मको तलबको व्यवस्था गरिएको जानकारी दिइएको छ । 

यसनिम्ति भरतपुरको बसेनीमा सम्पर्क कार्यालय खोलेर प्रमुख कार्यकारी अधिकृतका रुपमा हेमन्त बराललाई नियुक्त गरिएको छ । कार्यालयको उद्घाटनमा घण्टी बजाइएको थियो ।